Kiny
Eng
Fr
Uganda: Umushinga w’itegeko rihana ababana bahuje igitsina ‘abatinganyi’ rigiye kongera gusuzumwa.
Uwajeneza Donatha
Apr 21, 2023 - 11:12
Ishyaka riri ku butegetsi muri Uganda ryemeye ko itegeko rihana ababana bahuje ibitsina (bazwi nk'abatinganyi), ryari ryaremejwe n'inteko ishingamategeko mu kwezi gushize, risubizwa mu nteko kugira ngo ryongere risuzumwe. Icyakora amavugurura yifuzwa ntaramenyekana.
kwamamaza
Itangazo ry’inama y’abadepite ba NRM yabaye ku wa kane hamwe na Yoweri Museveni; Perezida wa Uganda, unakuriye ishyaka rya NRM, rivuga ko abadepite bemeranyijwe ku bitekerezo bijyanye n’ ivugurura ry’umushinga w'itegeko.
Ibi bitangajwe nyuma yaho kandi Perezida Museveni atangarije ko kenshi ingingo ijyanye n’ubutinganye ikenewe kuganirwaho kurushaho.
Umushinga w’itegeko wemezwa ku nshuro ya mbere, zimwe mu ngingo zawo, wateganyaga igifungo cya burundu ku bantu bavuga ko ari abatinganyi banazwi nk'aba LGBT ndetse n'igihano cy'urupfu ku kivugwa ko ari ubutinganyi bukaze cyane.
Icyakora amavugurura Perezida Museveni yifuza ko akorwa kuri uwo mushinga w'itegeko ntaramenyekana.
Ubusanzwe iyo itegeko ryemejwe n'inteko ishingamategeko, Perezida aba afite igihe kigera hafi ku kwezi cyo kurishyiraho umukono, kuryanga cyangwa kurisubiza abadepite kugira ngo barivugurure hanyuma inteko yongere iritorere.
Bwa mbere, Uyu mushinga w'itegeko wari watowe ku bwiganze bw'amajwi ku ruhande rw'ishyaka riri ku butegetsi no ku ruhande rw'abatavuga rumwe n'ubutegetsi.
Ishyaka NRM ryiganje mu nteko ishingamategeko ndetse aho rihagaze ku itegeko runaka buri gihe ni ho hatsinda.
Abanenga iri tegeko bavuga ko rishishikariza kwanga abatinganyi, rigahonyora itegekonshinga rya Uganda ndetse ko buri muntu wese ucyekwaho kuba ari umutinganyi rizamugiraho ingaruka.
kwamamaza