Kiny
Eng
Fr
UCI 2025: Gufunga imihanda byagabanyije imyuka ihumanya ku kigera kuri 45%
Uwajeneza Donatha
Oct 1, 2025 - 14:25
Raporo y' Ikigo cy’Igihugu gishinzwe kurengera ibidukikije (REMA) igaragaza ko ifungwa ry’imihanda mu Mujyi wa Kigali mu gihe cy’amarushanwa y'Isi y'amagare (UCI World Cycling Championships) ryagize uruhare rukomeye mu kugabanya umwuka wanduye ku kigero cya 45%.
kwamamaza
Iri ruahanwa ryabereye muri Kigali kuva ku itariki ya 22 kugeza ku ya 28 Nzeri (09) 2025, imihanda yakoreshwaga mu gihe cy'irushanwa yarafungwaga, imodoka zikanyura mu zindi nzira. Ikindi abakozi bashishikarijwe gukorera ku ngo ndetse amasomo aba ahagaze, hagakoreshwa ikoranabuhanga aho bishoboka.
Abacuruzi barangura bari baragiriwe inama yo kugenda mu masaha irushanwa ryarangiye, ibikamyo nabyo yarahawewe imihanda yo gukoresha.
Ubu buryo bwihariye bwo kugabanya umuvuduko w’ibinyabiziga bwahaye abashakashatsi amahirwe yo gupima ingaruka z’uburyo imodoka zitangiza ikirere.
Ibyavuye mu bipimo bigaragaza ko ku mihanda yafunzwe, ibipimo bya PM 2.5 (utunyangingo duto twangiza ubuzima) byagabanyutseho 45%, naho ku mihanda yakoreshwaga n'ibinyabiziga nk" inzira zo kwifashishwa, ibipimo byagabanyutseho hagati ya 30% na 35%.
Juliet Kabera, Umuyobozi Mukuru wa REMA, yavuze ati: “Ibi bisubizo bigaragaza neza ko kugabanya imodoka bigira uruhare mu kunoza umwuka duhumeka. Mu gihe cy’amarushanwa, ubuziranenge bw’umwuka bwari ku rwego rwemewe n’Ishami ry’Umuryango w’Abibumbye ryita ku Buzima (OMS). Ibi bikwiye kudutera ishyaka ryo gusigasira ibidukikije binyuze mu gukoresha imodoka rusange, gutembera n’amaguru cyangwa gutwara igare, ndetse no kwirinda ingendo zitari ngombwa.”
Ibi bipimo biahingiye ku makuru yakusanyirijwe kuri station 10 zigenzura umwuka zashyizwe mu bice bitandukanye by’umujyi birimo Gacuriro, Rusororo, Mont Kigali, Gikondo, Nyarutarama, Kibagabaga, Kimironko, Nyabugogo na Kimihurura (RDB).
Ibi bibaye mu gihe U Rwanda ruherutse gushyiraho uburyo bushya bwo kugenzura imyuka iva mu modoka, nk’ikimenyetso cy’ubushake bwo kurengera ubuzima binyuze mu kugabanya ihumana ry’umwuka abantu bahumeka ndetse n'iterambere rirambye.
REMA ivuga ko ibipimo byabonetse mu cyumweru cy’irushanwa rya UCI bishimangira akamaro ko gushyigikira ubwikorezi burambye mu mujyi, binyuze mu guteza imbere amagare, gutembera n’amaguru no gukoresha imodoka rusange.
kwamamaza