Kiny
Eng
Fr
Kwibuka31: Hari uwo bakubise ferabeto inshuro 50 agenda akururuka, ubugome bwakorewe Abatutsi mu cyahoze ari Komine Birenga
Gisubizo Philemon
Apr 16, 2025 - 09:12
Ku rwibutso rwa Jenoside rwa Kibungo habereye igikorwa cyo kwibuka ku nshuro ya 31 Jenoside yakorewe Abatutsi mu cyahoze ari Komine Birenga, aho hibutswe Abatutsi biciwe muri Eto Kibungo, muri Economat Kibungo ndetse n'ahandi, bakicwa n'interahamwe zari ziyobowe na Cyasa.
kwamamaza
Mu gikorwa cyo kwibuka ku nshuro ya 31 Jenoside yakorewe Abatutsi mu cyahoze ari Komine Birenga, ahahoze ari icyicaro cya Perefegitura ya Kibungo, akaba ari mu karere ka Ngoma mu murenge wa Kibungo.
Ndayisaba Simon Pierre, waharokokeye, yagaragaje uburyo interahamwe zari ziyobowe na Cyasa zishe Abatutsi bari bihishe mu cyahoze ari Eto Kibungo, Economat Kibungo ndetse n'ahandi, ku buryo abo bari kumwe bose bishwe areba ariko akaza kurokoka agahita yerekeza i Gafunzo muri Sake.
Ati "bagiye baducunda bavuga ngo Umututsi ninde utabyumvise akamanika akaboko bakamukuramo bakamwicira aho, tugakomeza bakatubaza ngo Umuhutu ninde utabyumvise atazamura ukuboko bakamukurura bakamwicira aho, turagenda tugera aho mu kibuga, hari uwo bakubise ferabeto inshuro 50 agenda akururuka, undi ni umu mama bafashe n'uruhinja bavuga ngo afite basaza be mu Nkotanyi baramurasa bamumariraho magazine (amasasu) kugeza abaye umukara, n'uruhinja narwo bararurasa".
Umuyobozi wa IBUKA mu karere ka Ngoma Biseruka Omar, yavuze ko biteye agahinda kuba hari abirengagiza ukuri kwa Jenoside yakorewe Abatutsi bakakurengaho bakayihakana ndetse bakanayipfobya. Ashima ingabo zahoze ari iza RPF- Inkotanyi ku butwari zagaragaje bwo guhagarika Jenoside, zikarokora Abatutsi bari basumbirijwe n'interahamwe.
Umunyamabanga nshingwabikorwa w'Intara y'Iburasirazuba Dr. Nyirahabimana Jeanne, wifatanyije n'abatuye umurenge wa Kibungo n'inshuti zabo mu gikorwa cyo kwibuka Jenoside yakorewe Abatutsi, yavuze ko Jenoside yateguwe ikanashyirwa mu bikorwa n'abanyarwanda, ariko ngo amahirwe ni uko yahagaritswe n'abanyarwanda, bityo asaba buri muntu kurwanya ingengabitekerezo yayo kuko nta mwanya ifite mu Rwanda.
Ati "Jenoside yarateguwe iraba amahanga arebera, Jenoside yakozwe n'abanyarwanda bayikorera abandi banyarwanda ariko Imana tugira nuko yahagaritswe n'abanyarwanda, ingengabitekerezo ya Jenoside tuvane aha umukoro wo gufatanya kuyirwanya kugirango iranduke burundu".
Muri iki gikorwa cyo kwibuka ku nshuro ya 31 Jenoside yakorewe Abatutsi mu 1994, mu rwibutso rwa Jenoside rwa Kibungo hashyinguwe mu cyubahiro imibiri 8 y'Abatutsi bazize Jenoside yabonetse. Ni mu gihe muri uru rwibutso, haruhukiyemo imibiri y'Abatutsi bishwe muri Jenoside isaga ibuhumbi 25, aba bakaba ari abo mu cyari Komine Birenga n'abakuwe muri Komine Kigarama, Remera, Kazo na Rurenge.
Djamali Habarurema / Isango Star Ngoma
kwamamaza