Kiny
Eng
Fr
MINUBUMWE yashyizeho imirongo igenga imitangire ya serivisi zo kubanisha Abanyarwanda
Gisubizo Philemon
Jan 26, 2024 - 09:23
Minisiteri y’Ubumwe bw’Abanyarwanda n’Inshingano Mboneragihugu (MINUBUMWE) yashyizeho imirongo igenga imitangire ya serivisi zo kubanisha Abanyarwanda, komora ibikomere no kubaherekeza mu rugendo rw’ubudaheranwa. Ni imirongo ishingiye kubikorwa bitatu aribyo komora ibikomere n’isanamitima, gusubiza mu buzima busanzwe abafite ibibazo byihariye, no guteza imbere imibanire myiza.
kwamamaza
Mu gutangiza inama yamurikiwemo iyi mirongo, Minisiteri y’Ubumwe bw’Abanyarwanda n’Inshingano Mboneragihugu yatangaje ko gushyiraho imirongo ngenderwaho bigamije kumva kimwe imiterere, uburemere n’uburyo bukomatanyije abanyarwanda bakwiye gukoresha mu gukemura ibibazo biremereye umuryango nyarwanda.
Uwari umuyobozi nshingwabikorwa ushinzwe ubumwe bw'Abanyarwanda n'ubudaheranwa muri MINUBUMWE, Hon. Uwacu Julienne arasobanura ko iyi mirongo ishingiye kubikorwa bitatu aribyo komora ibikomere n’isanamitima, gusubiza mu buzima busanzwe abafite ibibazo byihariye, no guteza imbere imibanire myiza, itaje gukuraho iyari isanzweho ahubwo ije kuyunganira.
Ati "iyi mirongo ngenderwaho yashyizweho ntabwo yaje gukuraho uburyo bwakoreshwaga ahubwo iyi mirongo yaje kubwuzuza no gufasha kwisuzuma kugirango abantu barebe niba ibyo bakora bikwije ikigero twagombye kuba tugeraho, bituma nta muntu utayibonamo kuko uburyo bukoreshwa bugiye bugira amazina atandukanye, hari abavuga bati 'Mvura nkuvure', ayo mazina ntabwo tuje kuyakuraho ahubwo ni ukureba ko ubwo buryo bwubaharizwa".
Ariane Inkesha uhagarariye umuryango international alert wafatanyije na MINUBUMWE mu gushyiraho iyi mirongo avuga ko abantu baba bafite ibikomere bitandukanye ari nayo mpamvu iyi mirongo ije gufasha mu rugendo rwo komora ibyo bikomere.
Ati "abantu bafite ibikomere bitandukanye, hari ubwo usanga ari abantu bakomeretse koko byimazeyo, ugasanga abo bantu bagomba kwitabwaho byihariye, ariyo mpamvu twese nk'abafatanyabikorwa kubyumvikanaho, tuti ese iyo duhuye n'abo tuzabitaho gute, ni uruhe rugendo tugomba kwitaho tutabasiga twarafunguye ibikomere tukabata ku gasozi kandi agomba kuba umuntu wihagazeho wubaka sosiyete Nyarwanda".
Muri ibi bikorwa byo komora ibikomere n’isanamitima, MINUBUMWE ivuga ko urubyiruko rugomba kwitabwaho mu buryo bwihariye kuko ngo n'ubwo imibare igaragaza ko benshi bavutse nyuma ya Jenoside yakorewe Abatutsi mu 1994, ubushakashatsi butandukanye bugaragaza ko n'abo bahura n’ihungabana riva kuri Jenoside yakorewe Abatutsi n’ingaruka zayo.
Inkuru ya Yassini Tuyishimire / Isango Star Kigali
kwamamaza