Kiny
Eng
Fr
Kagame yakiriye itsinda rya Banki y’Isi baganira ku bufatanye mu mishinga y’iterambere
Uwajeneza Donatha
Nov 19, 2025 - 19:05
Perezida Paul Kagame yakiriye kuri Village Urugwiro itsinda rya Banki y’Isi riyobowe na Ndiamé Diop, Visi Perezida wayo mu Karere ka Afurika yo Hagati n’iy’Amajyepfo, baganira ku bufatanye busanzwe hagati y’u Rwanda na Banki y’Isi ndetse n’inzego z’ingenzi iyi banki ikomeje gutangamo umusanzu mu kubaka iterambere ry’Igihugu.
kwamamaza
Kuri uyu wa Gatatu, ku wa 29 Ugushyingo (11) 2025, nibwo Perezida Kagame yakiriye iri tsinda mu Biro bye, Village Urugwiro. Muri ibi biganiro, Umukuru w'Igihugu yari kumwe n’Umujyanama we wihariye, Francis Gatare, hamwe na Minisitiri w’Imari n’Igenamigambi, Murangwa Yusuf.
Banki y’Isi, yashinzwe mu 1944, ndetse isanzwe ari umufatanyabikorwa ukomeye w’u Rwanda mu mishinga itandukanye irimo ijyanye n'ibidukikije, ibikorwaremezo.
Mu masezerano aheruka u Rwanda rwagiranye na Banki y’Isi harimo aya miliyari 355 Frw yashyizweho umukono mu Ukuboza (12) 2024, agamije gufasha abikorera kongera ubushobozi mu bikorwa birambye.
Ni mu gihe kuva ku wa 14 Werurwe (03) kugeza ku wa 9 Nzeri (09) 2025, u Rwanda na Banki y’Isi byateguye imishinga itandatu irimo kurengera ibidukikije, gutwara abantu mu mijyi, gufasha impunzi no guhangana n’ibiza. Biteganyijwe ko iyo mishinga izatwara miliyoni 531,81 z’Amadolari ya Amerika, zingana na miliyari 763,3 Frw. Gusa ishyirwa mu bikorwa ryayo ritegereje kwemezwa n’Inama y’Ubutegetsi ya Banki y’Isi.
Icyakora uru ruzinduko rurasa n'urushimangira imikoranire na Banki y’Isi mu iterambere ry’u Rwanda.
kwamamaza