Kiny
Eng
Fr
Inteko ishingamategeko yemeje itegeko rishya rigenga polisi ririmo ingingo iha RIB ububasha bwo kugenza ibyaha.
Uwajeneza Donatha
Apr 28, 2023 - 09:19
Inteko nshingamategeko, imitwe yombi, yemeje itegeko rishya riha Polisi ububasha bwo gukora ubugenzacyaha kur’uyu wa kane, nyuma yo kurikorera ubugororangingo. Bamwe mu badepite bari bayoboye uyu mushinga bavuga ko witezweho kongerera ubushobozi mu mikorere ya polisi, kugabanya ndetse no gufata abanyabyaha mu buryo butandukanye.
kwamamaza
Nyuma yuko Inteko Rusange yemeje raporo ya Komisiyo ihuriweho n’Imitwe yombi ikubiyemo ubugororangingo bwakozwe, hamwe na Sena n'ibijyanye no kunoza imyandikire y'iri tegeko hakurikijwe imyandikire mishya iteganywa n’imirongo ngenderwaho y’imyandikire y’amategeko, mu itegeko rishya riha ububasha polisi y’igihugu kugenza ibyaha ryashyikirijwe inteko rusange umutwe wa sena ku wa kane, ku ya 27 Mata (04) 2023, maze rinozwa ku ngingo zitari zitumvikanwagaho kimwe.
Hon Hadidja Murangwa Ndangiza; Perezida wa komisiyo y’ububanyi n’amahanga ubutwererane n’umutekano mu mutwe wa Sena, ari nawe ukuriye uyu mushinga, yagize ati: “Imitwe yombi uwa Sena n’uw’abadepite wafashe umwanya kugira ngo wongere usuzume icyo Sena yari yaremeje nk’itegeko rya Polisi, ikaba yararyemeje hashize igihe. Ariko mu bugororangingo bwakozwe n’umutwe w’abadepite, nkuko bigenda kuko iyo itegeko ryemejwe na Sena rijya mu mutwe w’abadepite, hanyuma bagasuzuma nabo ibyo twakoze , nabo bakaryemeza.”
“ icyabaye rero twabiganiriyeho dusanga ubugororangingo bwari bwarakozwe na Sena nta kibazo, ko bikurikije amabwiriza n’amategeko agenderwaho mu kwandika amategeko. Iyo raporo twatanze uyu munsi, yari ukugaragariza umutwe wa Sena icyo umutwe w’abadepite wari waribajije , hanyuma tubereka ko mu by’ukuri ntacyo komisiyo bashyizeho yahinduye kubyari byarakozwe mbere. Byari ukwemeza ko ibyakozwe mbere nta kibazo byari bifite.”
Hon Hadidja Ndangiza; anavuga ko mu kwemezwa kw’iryo tegeko n’ingingo ziyigize biha ububasha Polisi kugenza ibyaha.
Ati: “ubundi iri tegeko ryaje kugira ngo ahanini ryongere risuzume inzego za Polisi uburyo zikora. Ariko noneho umwihariko warurimo wari uwo kugira ngo ubushinjacyaha nabwo buhabwe ububasha bwo kuba bwagenza icyaha kikiba.”
“ ubwo burenganzira ntabwo RIB yaribufite, bikaba ari mu bintu bimwe iri tegeko ryazanye nk’ikintu nyamukuru cyatumye rihinduka.”
Polisi y’u Rwanda yahawe ububasha bwo gufata umuntu ukekwaho icyaha, ushakishwa, uwacitse inzego z’umutekano cyangwa iz’ubutabera ibyibwirije, cyangwa ibisabwe n’inzego zibifitiye ububasha ikamushyikiriza inzego z’ubugenzacyaha.
Yahawe kandi ububasha bwuzuye bw’ubugenzacyaha ku byaha by’impanuka zo mu muhanda.
Iri tegeko rigenga polisi y’u Rwanda ryateganyije ibihano byerekeye gutoroka polisi y’u Rwanda.
Iri tegeko ryemejwe n’amasenateri 23, bivuzwe ko ryatowe n’inteko rusange ya Sena.
@ BERWA GAKUBA Prudence/Isango Star-Kigali.
kwamamaza