Kiny
Eng
Fr
Imvura idasanzwe n’umuyaga mwinshi biteganyijwe muri Nzeri 2025
Uwajeneza Donatha
Sep 1, 2025 - 07:24
Ikigo cy’Igihugu cy'iteganyagihe (Meteo Rwanda) cyatangaje ko mu kwezi kwa Nzeri (9) 2025, mu Rwanda hateganyijwe kugwa imvura nyinshi idasanzwe mu gihe nk'iki cy'imvura. Hateganyijwe kuzagwa imvura iri hagati ya milimetero 35 na 230, iri hejuru y’impuzandengo isanzwe ingana na milimetero 35 kugeza kuri 200.
kwamamaza
Imvura nyinshi kurusha ahandi iri hagati ya milimetero 195 na 230 iteganyijwe cyane mu turere two mu Ntara y’Iburengerazuba, n’Amajyepfo y’igihugu, mu Turere twa Rusizi, Nyamasheke, Rutsiro na Rubavu, mu Turere twa Karongi, Nyabihu na Musanze uretse uburasirazuba bwatwo, ibice byo hagati n’amajyaruguru by’Akarere ka Burera, uburengerazuba bw’Uturere twa Ngororero, Nyamagabe na Nyaruguru
Imvura iri hagati ya milimetero 155 na 195 iteganyijwe mu Turere twa Muhanga, Gakenke na Rulindo, amajyaruguru y’Akarere ka Gicumbi, mu bice by’amajyaruguru n’iby’uburengerazuba by’Uturere twa Kamonyi, Ruhango na Nyanza, ibice byo hagati by’Akarere ka Nyaruguru ndetse n’ahasigaye mu Turere twa Burera, Musanze, Nyabihu, Ngororero, Karongi na Nyamagabe.
Naho Imvura iri hagati ya milimetero 115 na 155 iteganyijwe mu karere ka Huye, mu Turere twa Gasabo na Nyagatare uretse ibice by’amajyepfo yatwo, uburengerazuba bw’Uturere twa Gatsibo na Gisagara, amajyaruguru y’Akarere ka Nyarugenge, ibice byo hagati by’Uturere twa Nyanza, Ruhango na Kamonyi, ndetse n’ahasigaye mu Turere twa Gicumbi na Nyaruguru.
Nimugihe mu Mujyi wa Kigali, Rwamagana na Kicukiro hitezwe imvura iri hagati ya milimetero 75 na 115, mu gihe mu bice bimwe byo Burasirazuba hateganyijwe imvura iri hasi, kuva kuri milimetero 35 kugeza kuri 75.
Ubushyuhe bwo ku manywa buteganyijwe buzagera hagati ya dogere celesiyusi 18 na 32, aho mu karere ka Kicukiro, Nyarugenge, Bugesera, Ngoma na Kayonza hazashyuha kurusha ahandi, mu gihe Musanze na Nyabihu bizagira ubushyuhe bwo hasi (18-20°C). Nijoro, mu Burengerazuba bwa Musanze, Nyamagabe na Nyaruguru harateganyijwe ubukonje bukabije buri kuri dogere celesiyusi 6.
Meteo Rwanda inavuga ko umuyaga uringaniye ushyira kuba mwinshi uteganyijwe muri uku kwezi, ufite umuvuduko uri hagati ya metero 4 na 12 ku isegonda. Mu turere twa Rubavu, Rutsiro, Nyamasheke, Musanze na Nyagatare niho hitezwe umuyaga mwinshi kurusha ahandi.
Meteo Rwanda irakangurira abaturage kwitwararika ku ngaruka zishobora guterwa n'umuyaga mwinshi ndetse n'inkuba, kuko biteganyijwe kumvikana hirya no hino mu gihugu.
Nimugihe kuri uyu wa mbere, ku ya 1 Nzeri (09) 2025, kuva saa 6:00 kugeza saa sita z'amanywa, hateganyijwe ibicu byiganje bidatanga imvura mu turere twose tw'igihugu.
kwamamaza