Kiny
Eng
Fr
“Ibidutanya ntibikwiye kudusenya, bikwiye kutubera inzira ikomeza demukarasi yacu.” Ubutumwa bwa Never Again Rwanda.
Chief Editor
Sep 15, 2025 - 17:10
kuri uyu wa mbere, abanyepolitiki, urubyiruko n’abahagararariye imiryango mpuzamahanga mu Rwanda bahuriye mu biganiro byo kuzirikana umunsi mpuzamahanga wa Demokarasi.
kwamamaza
Kuri uyu wa Mbere, u Rwanda rwifatanyije n’Isi kwizihiza Umunsi mpuzamahanga wa Demukarasi, uri kwizihizwa ku nshuro ya 18, kuva ushyizweho n’Umuryango w’Abibumbye mu 2007.
Iya 15 Nzeri ni itariki ngarukamwaka yagenwe n’Inteko Rusange ya Loni nk’umunsi wo gusuzuma no kuzirikana amahame ya demukarasi.
Mu Rwanda, uyu munsi wizihijwe binyuze mu biganiro byateguwe na Never Again Rwanda, byitabiriwe n’ab’ingeri zitandukanye barimo abanyepolitiki, urubyiruko n’abahagararariye imiryango mpuzamahanga.
Abitabiriye iki gikorwa bahawe ibiganiro bitandukanye bigaruka ku rugendo rwagejeje u Rwanda kuri demukarasi, uburere mboneragihugu bukwiye, kubaka igihugu kidaheza n’imiyoborere ikwiye.
Ni ikiganiro cyatanzwe n’abarimo Dr Frank Habineza uyobora Ishyaka Green Party, Umuyobozi Mukuru Wungirije w’Urwego rw’Igihugu rw’Imiyoborere (RGB), Dr. Félicien Usengumukiza n’Inararibonye muri Politiki, Dr. Jean Paul Kimonyo.
Umuyobozi Nshingwabikorwa wa Never Again Rwanda, Dr. Joseph Nkurunziza Ryarasa, yavuze ko u Rwanda rwagaragaje ko ibishobora gutandukanya abantu byakurwamo imbaraga zo kubakiraho ibirambye.
Ati “Ibidutanya ntibikwiye kudusenya, bikwiye kutubera inzira ikomeza demukarasi yacu.”
Umuvugizi w’Ingabo z’u Rwanda, Brig Gen Ronald Rwivanga, yashimangiye ko igitero cyose kigabwa ku Rwanda kiba kigambiriye ikibi kuri rwo.
Yabikomojeho mu kiganiro yatanze ubwo hizihizwaga Umunsi Mpuzamahanga wa Demukarasi, mu kiganiro kigaruka ku ishusho ya demukarasi mu Karere n’uburyo bwo gukemura ibibazo by’ingutu byugarije umutekano na politiki ijegajega. Yagihuriyemo na Amb. Joseph Mutaboba na Dr. Frederick Golooba-Mutebi.
Yakomeje ati “Tuzakomeza kurinda ubusugire bw’Igihugu cyacu n’abaturage bacu. Iyo umutekano wacu ubangamiwe, dufata ibyemezo n’ingamba zihamye dukoresheje bukenewe ku buryo uwabigizemo uruhare yumva ingaruka zabyo.”
kwamamaza