Kiny
Eng
Fr
Afrika y’Epfo igiye guhindura itegeko rishobora gutuma Putin yitabira inama ya BRICS nta nkomyi.
Uwajeneza Donatha
May 31, 2023 - 10:42
Clayson Monyela; Umuvugizi wa minisiteri y’ububanyi n’amahanga muri Afrika y’Epfo, yatangaje ko hari ubudahangarwa butangwa iyo igihugu cyakiriye inama mpuzamahanga. Ibi yabigarutseho nyuma y’uko Minisiteri abereye umuvugizi itanze ubudahangarwa ku badipolomate baturutse mu mahanga bazitabira inama y’itsinda rya BRICS izaba muri Kanama (8) uyu mwaka, hamwe n’inama ya ba Minisitiri b’ububanyi n’amahanga bo muri BRICS izaba mur’iki cyumweru.
kwamamaza
Itsinda BRICS rigizwe na bimwe mu bihugu bifite ubukungu burimo gutera imbere cyane ku isi, ari byo Brazil, Uburusiya, Ubuhinde, Ubushinwa n'Afurika y'Epfo.
Ibitangazamakuru byo muri Afurika y'Epfo byatangaje ko ibyatangajwe na minisitiri w'ububanyi n'amahanga byo gutanga ubudahangarwa bishobora gufungurira umuryango Perezida w'Uburusiya Vladimir Putin akitabira inama yo muri Kanama (08) izabera muri Afurika y'Epfo.
Ni nyuma yaho muri Werurwe (03) uyu mwaka, urukiko mpuzamahanga mpanabyaha (ICC/CPI) rusohoye urupapuro rwo guta muri yombi Perezida w'Uburusiya ku byaha byo mu ntambara aregwa gukorera muri Ukraine.
Afurika y'Epfo, nk'igihugu cyashyize umukono ku masezerano ya Roma ashyiraho urukiko rwa ICC, yitezweho gushyira mu bikorwa urwo rupapuro rwo guta muri yombi, maze igata muri yombi Perezida Putin.
Yifashishije ubukuta rwe rwa twitter, Ariko Clayson Monyela, umuvugizi wa minisiteri y'ububanyi n'amahanga y'Afurika y'Epfo, yatangaje ko ubudahangarwa nk'ubwo busanzwe butangwa iyo igihugu cyakiriye inama mpuzamahanga.
Yagize ati: “Ubudahangarwa ntibukuraho urupapuro rwo guta muri yombi urwo ari rwo rwose rwasohowe n'urukiko (nka ICC) ku muntu uwo ari we wese witabiriye inama".
Mbere, Afurika y'Epfo yigeze kunanirwa gushyira mu bikorwa inshingano yo mu rwego rw'amategeko ifite kuri ICC, ubwo mu 2015 uwari Perezida wa Sudan Omar al-Bashir yasuraga icyo gihugu ku butegetsi bwa Perezida Jacob Zuma, ariko ntiyamuta muri yombi.
Ku wa mbere, igisirikare cy'Afurika y'Epfo cyavuze ko kitazata muri yombi Putin naramuka yitabiriye inama ya BRICS, kuko nta bubasha gifite bwo gushyira mu bikorwa urupapuro rwo kumuta muri yombi.
Umugaba mukuru w'ingabo z'Afurika y'Epfo Jenerali Rudzani Maphwanya yavuze ko nubwo azi iby'urwo rupapuro rwa ICC rwo guta muri yombi Putin, igisirikare gikorera mu murongo w'amategeko mpuzamahanga kandi ko cyubaha ubudahangarwa bwahawe aba diplomate.
Ku rundi ruhande, minisitiri wungirije wo muri Afurika y'Epfo yabwiye BBC ko iki gihugu kigiye guhindura itegeko ryacyo kugira ngo kigire ububasha bwo gufata icyemezo niba cyata muri yombi cyangwa ntigite muri yombi umutegetsi ushakishwa na ICC.
Obed Bapela, Minisitiri wungirije mu biro bya Perezida w'Afurika y'Epfo, yagize ati: "Muri Kamena [06] tuzageza itegeko mu nteko ishingamategeko.”
Binyuze muri iryo tegeko, Bapela yavuze ko Afurika y'Epfo iziha ubudahangarwa [gusonerwa] ku muntu wo guta muri yombi n'uwo kudata muri yombi.
Mu kiganiro n'abanyamakuru, ubwo Dmitry Peskov, umuvugizi w'ibiro bya Perezida w'Uburusiya, yari abajijwe niba Putin azitabira inama ya BRICS yo muri Afurika y'Epfo izaba muri Kanama, yavuze ko Uburusiya buzayitabira ku rwego rukwiye.
Ibiro ntaramakuru TASS bya leta y'Uburusiya bwasubiyemo amagambo ya Peskov asezeranya ko azatanga amakuru arambuye yose nyuma.
Afurika y'Epfo yanze kwamagana igitero gisesuye cy'Uburusiya kuri Ukraine cyagabwe kuva muri Gashyantare (2) mu 2022, ishimangira ko ishaka kuguma nta ruhande ibogamiyeho muri iyo ntambara.
kwamamaza