Kiny
Eng
Fr
Tanzania: umuyobozi w'abatavugarumwe n'ubutegetsi yashinjwe ubugambanyi
Uwajeneza Donatha
Apr 11, 2025 - 11:26
Tundu Lissu, umuyobozi w’abatavuga rumwe n’ubutegetsi muri Tanzania, yarezwe ubugambanyi nyuma yo gufatwa amaze gukora mitingi mu majyepfo y’iki gihugu. Icyo kirego gishingiye ku bukangurambaga bwe busaba amavugurura ajyanye n’amatora, burimo intero igira iti: “Nta mavugurura, Nta matora”.
kwamamaza
Ubusanzwe amatora ateganyijwe muri Ukwakira (10) 2025, aho Lissu azahatana na Perezida Samia Suluhu Hassan.
Mu rukurikirane rw'ibikorwa yagiye akora muri rubanda, Lissu yakomeje kuvuga ko nta mahirwe ahari ko hashobora kubaho amatora yo mu bwisanzure no mu mucyo mu mezi atandatu ari imbere, keretse habayeho amavugurura.
Uyu mukuru w'ishyaka CHADEMA ritavuga dumwe n'ubutegetsi, ashaka ko haba impinduka mu kanama k'amatora. Yavuze ko kadakwiye kubamo abantu bashyirwaho mu buryo butaziguye na Perezida Samia ubwe.
Abategetsi bavuze ko ubukangurambaga bwe ari ugushishikariza abaturage kwigomeka ku ikorwa ry'amatora rusange.
Amakuru avuga ko Polisi yateye imyuka iryana mu maso mu gihe yashakaga guhagarika ikiganiro cya CHADEMA n’abanyamakuru kijyanye n’itabwa muri yombi rya Lissu.
Icyakora abayoboke b'ishyaka rye bavuga ko batazahagarika gusaba impinduka mbere y’amatora.
Lissu yashinjwe ubugambanyi nyuma y'umunsi umwe atawe muri yombi ndetse ahita agenda imbere y'ubutabera.
Icyakora urubanza rwe ruzasubukurwa ku ya 24 Mata (04).
Si ubwa mbere afunzwe azira kutavuga rumwe n'ubutegetsi kuko no mu bihe byashize, yigeze gufungwa kenshi, ndetse mu 2017 yarashwe amasasu 16, arafatwa n’ingoboka ahungira hanze.
Yagarutse mu gihugu mu 2020 agahatana na Magufuli, ariko avamo yanga ibyavuye mu matora. Yongeye kugaruka mu 2023 nyuma y’impinduka zari zakozwe na Perezida Samia mu rwego rwo koroshya igitugu cya politiki, none nawe yaje gushinjwa kwivugana abatavuga rumwe n'ubutegetsi bwe.
kwamamaza