Kiny
Eng
Fr
U Rwanda rwiyemeje kuzamura umubano warwo na Guinnée-Conakry - Amb. Olivier Nduhungirehe
Gisubizo Philemon
Oct 10, 2024 - 08:09
Igihugu cy’u Rwanda na Republika ya Guinnée-Conakry, kuri uyu wa Gatatu bashyize umukono ku masezerano atandukanye y’ubufatanye mu rwego rwo gukomeza gutsura umubano w’ibihugu byombi.
kwamamaza
Ni amasezerano agera kuri 12 yasinyiwe i Kigali ashyirwaho umukono na ba Minisitiri b’ububanyi n’amahanga b’ibihugu byombi azibanda ku bubanyi n’amahanga, umutekano, ubuzima, umuco,urubyiruko,uburezi, sport n’ibindi biteza imbere umubano w’ibihugu byombi nkuko bivugwa na Minisitiri w’ububanyi n’amahanga n’ubutwererane Amb. Olivier Nduhungirehe.
Ati "Uyu munsi twasinye amasezerano 12 y’ubufatanye mu bice bitandukanye birimo ubukerarugendo, guteza imbere ubucuruzi bw’ibyoherezwa mu mahanga, urubyiruko, umuco n’ivugurura mu miyoborere, aya masezerano agaragaza ubushake busangiwe bwo gushyira mu bikorwa intego z’abakuru b’ibihugu byombi, kandi azaba umusingi w’ibiganiro byinshi ku ngingo z’inyungu dusangiye, ndashaka kongera gushimangira ko u Rwanda rwiyemeje kuzamura umubano warwo na Guinea. Ubufatanye bwacu bushingiye ku kwizerana n’ubufatanye buzatuma tugera ku ntego zacu z’iterambere ndetse tunateze imbere amahoro n’umutekano mu karere kacu".
Minisitiri w’ububanyi n’amahanga wa Rebuplika ya Guinnée-Conakry Dr. Morissanda Kouyaté, nawe yavuze ko ubu bufatanye ari ingirakamaro kandi ari imbarutso mu gukomeza umubano mu bihugu byombi.
Ati "Ubu bufatanye hagati y’u Rwanda na Republika ya Guinnée-Conakry nizeye ko buzakomeza ubuvandimwe no gukorana neza bikagaragaza imirimo yacu kandi ni imbaraga z’ingirakamaro n’imbarutso y’umubano mu nzego zose no kubahiriza intego zaya masezerano".
Ubusanzwe u Rwanda rufitanye ubufatanye na Repubulika ya Guinnée-Conakry nko mu bwikorezi bwo mu kirere nk’ingendo z’indege zihuza Guinnée-Conakry na Kigali, ubukerarugendo n’ubucuruzi,ndetse hafunguwe Ambasade mu bihugu byombi.
Inkuru ya Vestine Umurerwa/ Isango Star Kigali
kwamamaza