Kiny
Eng
Fr
OMS yatangaje ko nta biribwa n’imiti biragera muri Tigray, Ethiopia irabihakana.
Uwajeneza Donatha
Nov 10, 2022 - 10:48
Ishami ry'umuryango w'abibumbye ryita ku buzima (OMS) riravuga ko nta biribwa cyangwa imiti byari byagera muri Tigray, mu majyaruguru ya Ethiopia, nubwo mu cyumweru gishize hashyizwe umukono ku masezerano yo guhagarika imirwano. Icyakora Ethiopia irabinyomoza.
kwamamaza
Umuryango w'abibumbye (ONU) washinje Ethiopia gukoresha kwicisha inzara nk'intwaro yo mu ntambara muri Tigray, aho uvuga ko ukutahagera kw'imfashanyo kwashyize mu byago abaturage 90 ku ijana bahatuye.
Dr. Tedros Adhanom Ghebreyesus; ukuriye OMS, yagize ati: "Nta kintu na kimwe kirimo kugenda. Nari niteze ko ibiribwa n'imiti bitangira kuhagera ako kanya nyuma yo guhagarika imirwano. Ariko ibyo ntibiri kuba".
Yavuze ko abantu barimo kwicwa no kubura ibiribwa ndetse bakicwa n'indwara zishobora kuvurwa.
Dr Tedros, ukomoka muri Tigray, yanasabye ko itumanaho rya telefone risubizwaho, banki zikongera gukora, hamwe n'izindi serivisi z'ibanze.
Yavuze ko abantu miliyoni esheshatu bamaze imyaka ibiri batamenya ibibera ahandi ku isi nkaho batabaho.
Umutegetsi umwe wo muri Ethiopia yashinje Dr Tedros kugerageza kubangamira amasezerano y'amahoro kandi ko ibiribwa n'imiti birimo kugera muri Tigray.
Yavuze ko umuriro w'amashanyarazi na serivisi z'itumanaho byasubijweho mu duce tumwe.
kwamamaza