Kuri uyu wa Mbere tariki ya 22 Ukuboza, mu Ishuri ry’amahugurwa rya Polisi (PTS) i Gishari mu Karere ka Rwamagana, habereye umuhango wo gusoza amahugurwa ya ba ofisiye bato 145 ajyanye n'ubunyamwuga n'ubuyobozi.

kwamamaza

Ni amahugurwa yitabiriwe n'abaturutse mu nzego zishinzwe iyubahirizwa ry’amategeko zitandukanye mu Rwanda, mu gihe kingana n’amezi ane (4) barimo abapolisi 132 bo ku rwego rwa ba Ofisiye bato, bane (4) bo mu rwego rw’Igihugu rushinzwe Ubugenzacyaha (RIB), batanu (5) bo mu rwego rw’Igihugu rushinzwe Igorora (RCS) na bane (4) bo mu rwego rw’igihugu rushinzwe Iperereza n’Umutekano (NISS).

Bize amasomo atandukanye arimo; imikorere y’akazi ka buri munsi, Ibikorwa byo gucunga umutekano, amasomo y’itumanaho, Ubuyobozi n’imicungire y’abakozi, ubugenzacyaha, ibijyanye n’ubushakashatsi, uburyo bwo guhangana n’ibibazo by’umutekano w’Igihugu, iperereza n'Imikoreshereze y’intwaro, bakora n’urugendoshuri mu rwego rwo guhuza ibyo bize n’ibikorerwa mu kazi ahantu hatandukanye.

Basuye ingoro y'amateka y’urugamba rwo guhagarika Jenoside yakorewe Abatutsi mu 1994, basura Igicumbi cy'intwari i Remera, Ingoro Ndangamateka y' Urugamba rwo kubohora Igihugu, Urwibutso rwa Jenoside rwa Kigali n’ahandi.

Ubwo yasozaga aya mahugurwa ku mugaragaro, Umuyobozi Mukuru wa Polisi y’u Rwanda (IGP), CG Felix Namuhoranye wari kumwe na Komiseri mukuru w’urwego rw’u Rwanda rushinzwe igorora, CG Evariste Murenzi n’Umunyamabanga mukuru wa RIB Col (Rtd) Pacifique Kayigamba Kabanda, yashimangiye akamaro k’amahugurwa ahoraho ahabwa ba Ofisiye bato baturuka mu nzego zishinzwe iyubahirizwa ry’amategeko mu Rwanda.

Yagize ati: ‘‘Aya mahugurwa ni ingenzi kandi Polisi y’u Rwanda ifite gahunda yo kuyongerera ubushobozi n’umubare w'abayitabira ndetse n’abaturuka mu zindi nzego mu rwego rwo gukomeza ubufatanye mu gusigasira uyubahiririzwa ry’amategeko’’

Yakomeje ati: “Polisi y’u Rwanda yashyize imbere amahugurwa kuko ari yo nzira yo kubaka abapolisi bakora kinyamwuga. Nk’uko mubizi abapolisi bo ku rwego rwa ba ofisiye bato bagira inshingano zitandukanye kandi nyinshi, rero no kubongerera ubumenyi ni ingenzi cyane.”

IGP Namuhoranye yasoje avuga ko hari icyizere kidashidikanywaho ko amasomo abasoje amahugurwa bahawe azabafasha mu kurushaho kunoza akazi no gukora kinyamwuga akazi ko gucunga umutekano w’abantu n’ibyabo, kureba ko amategeko yubahirizwa no gukumira ibyaha cyane cyane mu bufatanye n'abaturage n’izindi nzego.”

Umuyobozi w’Ishuri rya Polisi ry’amahugurwa, Commissioner of Police (CP) Robert Niyonshuti, yavuze ko mu gihe cy’amazi ane bamaze bahugurwa, bize amasomo atandukanye azabafasha kuzuza neza inshingano zabo.

Yagize ati: “Intego nyamukuru y’amahugurwa mumazemo iminsi ni ukubaha ubumenyi bwa ngombwa bukenewe ngo mwuzuze neza inshingano nk’abayobozi kugira ngo abo muyobora babigireho kandi bagendere mu murongo uhesha isura nziza akazi bakora, urwego ndetse n’igihugu muri rusange.”

Yasoje abashimira umurava n’ubwitange bagaragaje mu gihe cy’amasomo, abasaba kuzakomeza kwihugura no gukoresha neza ubumenyi bungutse mu kazi ka buri munsi, kandi ko aya mahugurwa yateguwe kugira ngo abongerera ubumenyi mu miyoborere, gutegura, kuyobora no kugenzura ibikorwa bya Polisi ku rwego rwabo.