Ku wa mbere, umurwa mukuru wa Ukraine n’indi mijyi yarashweho hakoreshejwe  indege nto zintambara zizwi nka drone z'ubwiyahuzi, cyangwa "kamikaze drones", zoherejwe n'Uburusiya ariko byemezwa ko zakorewe muri Iran.

Zivugwa ko ari drone z'ubwiyahuzi kuko zihita zisandarana n'ibisasu zitwaye.

Minisiteri y'ububanyi n'amahanga y'Amerika ivuga ko iki gihugu cyemeranya n'isesengura ryakozwe n’Ubufaransa  ndetse n'iry'Ubwongereza ko izo drone zirenga ku mwanzuro 2231 w'akanama k'umutekano ka ONU.

Uwo mwanzuro ufitanye isano n'amasezerano ya nikeleyeri ya Iran, ubuza Iran gutanga ikoranabuhanga rimwe na rimwe rya gisirikare.

Ukraine yavumbuye ko ubwoko bw'izo drone  cyangwa ibinyabiziga byo mu kirere bitarimo umuntu ubitwaye, [unmanned aerial vehicles' (UAVs)] ivuga ko ari intwaro za Iran zizwi nka Shahed-136.

Vedant Patel; umuvugizi wungirije wa minisiteri y'ububanyi n'amahanga y'Amerika, yavuze ko “Twemera ko izi UAVs zoherejwe mu Burusiya zivuye muri Iran zigakoreshwa n'Uburusiya muri Ukraine ziri mu ntwaro zakabaye zikomanyirijwe bijyanye n'umwanzuro wa 2231.”

Ibi byakunze kugarukwaho kenshi ariko Iran yakunze guhakana koherereza Uburusiya izo ntwaro, ariko Patel yavuze ko Amerika yashyize ku karubanda ko Uburusiya bwakiriye drone zivuye muri Iran, ko ibi biri muri gahunda y'Uburusiya yo gutumiza UAVs zibarirwa mu magana zivuye muri Iran zo mu bwoko butandukanye.

Anavuga ko hari gihamya isesuye nyinshi ko Uburusiya buzikoresha muri Ukraine.

Ibikorwaremezo by'ingenzi byarashweho ku wa mbere mu turere twa Ukraine twa Kyiv, Dnipro na Sumy, umuriro w'amashanyarazi urabura mu mijyi n'ibyaro byose hamwe bibarirwa mu magana, nkuko byatangajwe na leta ya Ukraine.

Abantu batari munsi y'umunani barishwe barimo bane i Kyiv na bane mu mujyi wa Sumy. Amerika yavuze ko izaryoza Uburusiya ibyaha byabwo byo mu ntambara".

Anton Gerashchenko; umujyanama wa Minisitiri w'ubutegetsi bw'igihugu wa Ukraine, yashyize amashusho kuri Twitter avuga ko yerekana abapolisi ba Ukraine bahanura drone ya Iran, yongeraho ati: "Ducyeneye ubwirinzi bwo mu kirere!"

Patel yavuze ko umubano ukomeje gukomera hagati y'Uburusiya na Iran ari ikintu isi yose ikwiye kubona nk'igiteye inkeke.

Uburusiya na Iran byahaye ubufasha bukomeye bwa gisirikare Perezida Bashar al-Assad mu ntambara yo muri Syria.

Patel yagize ati: “Umuntu uwo ari we wese ukorana ubucuruzi na Iran, ushobora kuba hari aho ahuriye[ aho ari ho hose] na UAVs cyangwa ibyo gukora misile zo mu bwoko bwa ballistic cyangwa ibyo kuvana intwaro muri Iran zerekeza mu Burusiya, akwiye kwitonda cyane agakurikiza inzira zituma yirinda gukora amakosa. Amerika ntizazuyaza mu gukoresha ibihano.”

Igitero cyo ku wa mbere cyabaye hashize icyumweru Uburusiya burashe za misile zibarirwa muri za mirongo kuri Kiev no ku yindi mijyi imwe yo muri Ukraine, nyinshi muri izo misile zikaba zaribasiye ibikorwaremezo by'amashanyarazi.

Abasesenguzi bo mu Burayi n'Amerika bemeza ko izo drone za Iran zirimo gufasha Uburusiya gukomeza gukora ibitero bigeza mu ntera ndende nubwo misile zidahusha zirimo kuba nkeya ku Burusiya.

Josep Borrell; umukuru w'ububanyi n'amahanga mu muryango w'Ubumwe bw'Uburayi, avuga ko EU na yo irimo gukusanya ibimenyetso kuri drone za Iran kandi ko yiteguye kugira icyo ikora.

Joseph yatangaje ibi asa nk'uwumvikanisha ko EU ishobora gukaza kurushaho ibihano isanzwe yarafatiye Uburusiya.

Ibiganiro byo kuzahura amasezerano kuri nikeleyeri hamwe na Iran yo mu mwaka w’ 2015 kuri ubu byarahagaze.

Icyakora ibijyanye n'ayo masezerano yagiranye n'ibihugu bikomeye byo mu burengerazuba, Iran yemeye kugabanya ibikorwa bya nikeleyeri no kwemera ko amahanga akora ubugenzuzi muri Iran. Iran na yo igakurirwaho ibihano byazahaje ubukungu bwayo.