Kiny
Eng
Fr
Sudan: Umutwe wa RSF urashinjwa kwica Guverineri wawushinje gukora jenoside.
Uwajeneza Donatha
Jun 15, 2023 - 14:18
Abategetsi bo muri Sudan bavuga ko Guverineri w'akarere ka West Darfur yishwe n'umutwe witwara gisirikare witwa Rapid Support Forces (RSF), umaze igihe urwana n'igisirikare cya Sudan. Ni nyuma yuko atanze ikiganiro kuri televiziyo ashinja uyu mutwe kwica abaturage benshi, agasaba ingabo z'amahanga gutabara.
kwamamaza
Mu masaha abanziriza iyicwa rye, Khamis Abbakar yari yashinje umutwe wa RSF n'imitwe yitwaje intwaro ikorana na wo, gukora jenoside ku baturage bo mu bwoko bwa Masalit.
Abbakar wiciwe mu mujyi wa El Geneina, aho yari yaburiye ko ibitero byakwiriye hose muri uwo mujyi ndetse yari yasabye ubutabazi bw'amahanga.
Nubwo ubutegetsi bwa Sudan bwatangaje ibi, iyicwa rye rirasa nkaho ririmo urujijo kuko Guverineri yishwe nyuma yo guha ikiganiro televiziyo imwe ashija umutwe wa RSF kwica abaturage benshi, icyo yise jenoside, maze asaba ubutabazi ingabo z’amahanga.
Icyakora wifashishije twitter , Uyu mutwe watangaje ko"twakojeje intoki mu buryo butaziguye ku nzego z’ubutasi zifitanye isano n’igisirikare, zavugaga ko ari zo zateje intambara y’amoko muri West Darfur.”
“ Abakar yarabasanze abasaba uburinzi kandi yimurira ibiro bye i El-Geneina, mbere yuko abarwanyi binjira aho hantu, bashimuta Abakar baramwica.”
Guverineri Khamis Abbakar yahoze ari inyeshyamba ikomeye, mu mirwano yarangiye muri 2020. Kugeza ubu, ni umwe mubakomeye bamaze kwicwa kuva imirwano yatangira, dore ko hashize igihe mu mijyi ya Nyala na Zalingei haba ibikorwa nk'ibyo by'urugomo.
António Guterres; Umunyamabanga mukuru w'umuryango w'abibumbye, yavuze ko ababajwe cyane n'urugomo rushingiye ku bwoko no ku gitsina rurimo kwiyongera, aho rukorerwa abaturage b'abasivile muri Darfur, mu burengerazuba bw'igihugu.
Kuva mu myaka ya 2000, Ako karere kakomeje kugira ibihe by'intambara, ubwo abantu babarirwa muri za miliyoni bahungaga mugihe ababarirwa mu bihumbi amagana bishwe.
Icyo gihe imitwe yitwaje intwaro y'Abarabu yari yoherejwe n'ubutegetsi muri ako karere kurwanya inyeshyamba z'abatari Abarabu.
Kuva imirwano yasubira kwaduka kuva ku ya 15 Mata (04) uyu mwaka, hagiye hasinwa amasezerano y’agahenge ariko akarengwaho.
Imirwano ishyamiranyije imitwe yo mu gisirikare cya Sudan ishyigikiye umutegetsi wayo wo muri iki gihe, Gen. Abdel Fattah al-Burhan, n'umutwe witwara gisirikare wa RSF, utegekwa na Gen. Mohamed Hamdan Dagalo, uzwi cyane ku izina rya Hemedti.
Ihirikwa ry'ubutegetsi ryakozwe n'igisirikare ryo mu 2021 ryasoje igihe cy'imyaka irenga ibiri abasirikare n'abasivile bari bamaze basangiye ubutegetsi.
Amasezerano yo gusangira ubutegetsi yari yagezweho nyuma yuko uwari Perezida w'umunyagitugu Omar al-Bashir, wari umaze imyaka igera kuri 30 ku butegetsi, ahiritswe n'igisirikare nyuma y'imyigaragambyo ya rubanda.
@ Reuters, AL Jazeera, BBC.
kwamamaza