Nyaruguru: Abayobozi b’inzego z’ibanze barashinjwa kudashyira mu bikorwa ibyemezo by’inkiko

Mar 12, 2025 - 10:14

Nyaruguru: Abayobozi b’inzego z’ibanze barashinjwa kudashyira mu bikorwa ibyemezo by’inkiko

Abaturage baravuga ko bamwe mu bayobozi bo mu nzego z'ibanze babarangarana bakanga ibyemezo by'inkiko ntibabishyire mu bikorwa, bikavamo akarengane. Urwego rw'umuvunnyi rurwanya akarengane rwo ruvuga ko abayobozi bo mu nzego z'ibanze nkuko zegerejwe abaturage, bakwiye gukemura ibibazo byabo bitanagiye mu nkiko kuko zibahombya.

kwamamaza

Muri gahunda yo kwegera abaturage hagamijwe kumva ibibazo by'akarengane bafite, mu gihe cy'imyumweru, urwego rw'umuvunyi ruri gusura abatuye mu mirenge 14 igize akarere ka Nyaruguru.

Mu Murenge wa Kibeho, ibibazo abaturage barushyikirije, byiganjemo imanza z'imitungo itimukanwa zitarangijwe uko biri, n'izindi zabaye itegeko ariko zitarangijwe.

Umwe mu bafite iki kibazo, yagize ati: “ njyewe ikibazo mfite ni icy’akarengano. Umuntu yarandeze mu rukiko rwibanze rwa Kibeho ambeshyera, urubanza baruca ntahari. Baruca penal batarigeze bamenyesha, mbimenya ari uko baje kuntereza cyamunara mu kwezi kwa gatandatu.”

Undi ati: “ yadutwariye ubutaka muri 2023, yazanye umuhesha w’inkiko kurangiza urubanza rwarangijwe 2014.”

Abaturage bagejeje ibibazo byabo ku Muvunnyi Mukuru bagaragaje ko bishimiye ko byahawe umurongo, ibindi bigiye gusuzumwa mu mizi, aho ikibazo cyabereye.

Umwe ati: “ buriya bariya bayobozi arabakanguye, bagiye gukora noneho baduhe serivise neza.”

Undi ati: “ njyewe ndabona binshimishije kubera ko twe ikibazo cyacu twatangiye kucyinjiramo mu kwa cuminakabiri. Tugishyikiriza umurenge maze uduha inyandiko mvugo tuyohereza mu karere. Bari bataraza kubisuzuma none ikidushimishije ni uko umuvunnyi ukuru yaje, bahise bafata icyemezo ko bazaza bakaturangiriza. Bakaza kuri terrain bagahamagaza abaturage bakareba ibibazo biri aho hantu, urengena akarenganurwa, uri mu butaka bw’undi akabuvamo.”

NIRERE Madeleine; Umuvunnyi Mukuru, avuga ko abayobozi bo mu nzego z'ibanze nkuko zegerejwe abaturage, bakwiye gukemura ibibazo byabo bitanagiye mu nkiko zibahombya.

Ati: “ ikigaragara ni uko ari ibibazo bimaze igihe kinini bitarakemutse. Ku bayobozi, icya mbere ni byiza ko bakemura ibibazo, abaturage bitarinze kujya mu nkiko. Ubuyobozi bwegerejwe abaturage, rero abaturage bagomba kurangirizwa ibibazo. Izo manza zishingiye ku butaka. (..) akenshi iyo hajemo umuhesha w’inkiko w’umwuga usanga ahanini nk’imanza zaciwe n’abunzi cyangwa se inkiko z’ibanze zifite n’agaciro gatoya, usanga umuhesha w’inkiko w’umwuga azamo ugasanga ibyo umuntu yatsindiye, ayo umuhesha w’inkiko akuyemo niyo menshi.”

Umwaka ushize, urwego rw'Umuvunnyi rwasuye abaturage bo mu turere dutandukanye rukemura ibibazo bisaga 3 000. Nimu gihe muri uyu mwaka bamaze kwakira ibigera ku 1100 bishingiye ku butaka.

Imanza zasubirishijwemo n'Urwego rw'Umuvunnyi mu 2024, mu gihe inzira z’ubujurire ziba zarangiye, zigera kuri 354. Muri zo izingana na 2% nizo zigaragarayemo akarengane.

@ RUKUNDO Emmanuel/Isango Star-Amajyepfo.

Nyaruguru: Abayobozi b’inzego z’ibanze barashinjwa kudashyira mu bikorwa ibyemezo by’inkiko

Uwajeneza Donatha Mar 12, 2025 - 10:14