Kiny
Eng
Fr
Kenya: Perezida Ruto yasheshe umutwe wa polisi ushinjwa ubwicanyi
Uwajeneza Donatha
Oct 17, 2022 - 14:12
Perezida wa Kenya William Ruto yasheshe umutwe udasanzwe w’igipolisi wagiye ushinjwa ubwicanyi muri icyo gihugu mu myaka ishize.
kwamamaza
Ruto wagiye ku butegetsi mu kwezi gushize, yavuze ko ibi biri mu muhate wo kuvugurura inzego z'umutekano za Kenya.
Ku cyumweru yabwiye abari bateraniye mu rusengero ati: "Ni jye wategetse ko 'Special Service Unit' yagiye ikora ubwicanyi iseswa. Dufite umugambi w'uburyo tuzaha umutekano iki gihugu kugira ngo twirinde isoni z'abanyakenya bicwa imirambo yabo ikajugunywa hirya no hino mu ruzi Yala n'ahandi. Tugiye guhindura iki gihugu."
Daily Nation yatangaje ko raporo y'iperereza ku ibura ry'abahinde babiri n'umushoferi wabo w'umunyakenya ari yo yihutishije uko guseswa k'uwo mutwe wa polisi.
Abo bahinde babiri bageze muri Kenya mu kwezi kwa Mata (4) baje gufasha mu kwamamaza Ruto mbere y'amatora yari ateganyijwe muri Kanama (8), ariko hashize amezi atatu baburiwe irengero hamwe n'umushoferi wabo, nk'ukoDaily Nation ibitangaza.
Muri Mutarama(1), hagaragajwe ko mu myaka ibiri yari ishize mu ruzi rwa Yala hakuwemo imirambo 19 yari yaragiye yangirika mu buryo butandukanye.
Icyakora nta gihamya gihari cyerekana ko inzego z'umutekano zari zifite uruhare ku nkomoko y’iyo mirambo yatowe mu ruzi.
Ariko imiryango iharanira uburenganzira bwa muntu yagiye igaragaza kenshi ubwicanyi bumwe na bumwe ishinja abapolisi.
kwamamaza