Kiny
Eng
Fr
Ingabo za RDC zasubiye inyuma bifite impamvu - Perezida Tshisekedi yanze kwemera ko yatsinzwe na AFC/M23
Gisubizo Philemon
Dec 22, 2025 - 11:25
Perezida wa Repubulika Iharanira Demokarasi ya Congo, Félix Tshisekedi, yagaragaje ko atemera ko ingabo z’igihugu cye FARDC zatsinzwe n’ihuriro AFC/M23 mu rugamba rwabereye muri teritwari ya Uvira mu Ntara ya Kivu y’Amajyepfo.
kwamamaza
Mu nama y’ibihugu byo mu karere yabereye muri Uganda ku wa 21 Ukuboza 2025, Tshisekedi wayitabiriye yifashishije ikoranabuhanga rya video-conference yatangaje ko AFC/M23 yifashishije drones z’intambara muri uru rugamba n’izindi ntwaro ziremereye.
Tshisekedi yasobanuye ko icyo ingabo za RDC zakoreye muri Uvira ari ugusubira inyuma nk’imibare y’urugamba, mu rwego rwo kwirinda ko imirwano yazo na AFC/M23 yamenekeramo amaraso menshi y’abasivili, naho ubundi ngo si ukumanika amaboko cyangwa kwemera intege nke.
Yagize ati “Ingabo za RDC zasubiye inyuma bifite impamvu, mu rwego rwo kwirinda ko ubuzima bw’abasivili benshi bwahatikirira. Aya mahitamo si ugutsindwa cyangwa kugaragaza intege nke. Agaragaza uburyo duhora twiyemeje kurinda abasivili bari mu bihe bikomeye cyane.”
Uru rugamba rwatangiye mu ntangiriro z’Ukuboza 2025, ubwo ingabo za RDC, iz’u Burundi, Wazalendo na FDLR byarasaga mu bice bigenzurwa na AFC/M23 muri teritwari ya Walungu birimo Kamanyola na Kaziba, bikoresheje intwaro ziremereye.
Ibisasu ihuriro ry’ingabo za RDC ryarashe mu bice bigenzurwa na AFC/M23 byatumye abasivili benshi bahungira mu bice birimo umujyi wa Bukavu, abandi barenga 1000 bahungira mu Rwanda banyuze ku mupaka wa Bugarama.
Mu gusubiza, AFC/M23 yagiye guhanganira n’ihuriro ry’ingabo za RDC aho ryari ryashinze ibirindiro, iryambura ibice biri mu kibaya cya Rusizi birimo Katogota, Luvungi, Sange, Kiliba, yinjira no mu mujyi wa Uvira tariki ya 9 Ukuboza.
Bamwe mu basirikare ba RDC bahungiye mu Burundi, abandi bahungira mu mujyi wa Baraka muri teritwari ya Fizi, bakomereza mu ntara ya Tanganyika. Hari n’abagiye mu ishyamba rya Itombwe, abandi bafatwa mpiri.
Nubwo Tshisekedi avuga ko ingabo za RDC zavuye muri Uvira mu rwego rwo kwirinda ko amaraso y’abasivili ameneka, abasirikare bavuye muri ibi bice byafashwe na AFC/M23 bashinjwa kurenga ku mabwiriza bahawe n’ababakuriye yo gukomeza kurwana.
Tariki ya 19 Ukuboza, urukiko rwa gisirikare rwa Kalemie muri Tanganyika rwatangiye kuburanisha abasirikare 68 n’abapolisi 56 bahunze Uvira mu gihe urugamba rwabaga. Mu bihe byashize, abakurikiranyweho guhunga umwanzi bagiye bakatirwa igihano cy’urupfu.
kwamamaza