Kuri uyu munsi, Guverineri w’Intara y’Amajyaruguru Maurice Mugabowagahunde, afatanyije n’Umugaba w’Inkeragutabara muri RDF, Maj Gen Alex Kagame, n’Umuyobozi Wungirije wa Polisi mu Karere, CSP Prudence Ngendahimana, batangije ku mugaragaro imirimo yo kubaka ikiraro cya Ryabazira gihuza utugari twa Rurambo mu Murenge wa Remera (Musanze) na Cyabingo mu Karere ka Gakenke, mu gikorwa kiri muri gahunda ya Defence and Security Citizen Outreach Programme 2026, igamije gufasha abaturage mu iterambere n’imibereho myiza.

kwamamaza

Iki kiraro cya Ryabazira kiri ku muhanda munini Kigali–Musanze gihuza abaturage b’uturere twa Musanze na Gakenke ndetse n’abaturiye ako gace. Kongera kucyubaka bigamije gufatlsha abaturage guteza imbere ubuhahirane n’imigenderanire, by’umwihariko ku bacuruzi n’abahinzi bajyanaga umusaruro ku isoko rya Ryabazira, ndetse n’abanyeshuri bakoresha inzira zihakikije.

Abayobozi batangije iki gikorwa bagaragaje ko ari kimwe mu bikorwa by'inzego z'umutekano bigamije guteza imbere imibereho myiza y’abaturage, gahunda inzego z’umutekano zinyuzamo ibikorwa bifasha abaturage mu mibereho yabo ya buri munsi, birimo kubaka ibikorwaremezo no guteza imbere imibereho myiza.

Muri iyo gahunda kandi, mu Karere ka Gatsibo, igikorwa cyo gutangiza iyi gahunda cyabereye mu Murenge wa Ngarama, mu Mudugudu

wa Kabeho, aho abaturage n’abayobozi bifatanyije mu gutera ibiti hagamijwe kurengera ibidukikije no guteza imbere iterambere rirambye.

Iki gikorwa cyari kiyobowe n’Umugaba Mukuru w’Ingabo z’u Rwanda (Chief of Defence Staff), Gen MK Mubarakh, ari kumwe n’Umuyobozi Mukuru ushinzwe Ubutaka, Amazi n’Amashyamba, Philippe Kwitonda, hamwe n’abandi bayobozi.

Gen Mubarakh yashishikarije abaturage gukomeza kugira uruhare mu bikorwa byo kubungabunga ibidukikije no guteza imbere igihugu, anabashimira ubufatanye bagirana n’inzego z’umutekano mu gukomeza kubungabunga umutekano w’igihugu.