Kiny
Eng
Fr
Mohammed Salah yongeye kwegukana igihembo Cy'umukinnyi mwiza muri Premier league.
Gisubizo Philemon
Aug 20, 2025 - 11:25
Mohammed Salah ukinira Liverpool yatowe nk’umukinnyi mwiza w’umwaka muri Shampiyona y’u Bwongereza mu bihembo bitangwa n’Ishyirahamwe ry’Abakinnyi muri iki gihugu (PFA) Professional Footballers’ Association
kwamamaza
Ku mugoroba wo ku wa Kabiri tariki 19 Kanama 2025, ni bwo hatanzwe ibihembo kuba bakinnyi bahize abandi muri Premier League ya 2024/25, ibi bihembo bitangwa mu rwego rwo gushimira abakinnyi bitwaye neza muri shampiyona y'Ubwongereza (Premier League).
Abakinnyi bahataniraga iki gihembo barimo Mohammed Salah wa Liverpool, Bruno Fernandes wa Manchester United Alexander Isak wa Newcastle United, Alexis Mac Allister wa Liverpool, Cole Palmer wa Chelsea na Declan Rice wa Arsenal.
Iki gihembo cyegukanwe na Mohammed Salah ukinira Liverpool yegukanye igikombe cya shampiyona, Salah uyu mwaka w’imikino yatsinze ibitego 29 atanga imipira 18 yavuyemo ibitego, mu mikino 38 yakinnye muri uyu mwaka.
Nyuma yo kwegukana igihembo, Salah byamugize umukinnnyi wa mbere wegukanye iki gihembo inshuro nyinshi kuko ubu acyegukanye ku nshuro ya 3. Salah yabaye umukinnyi wa mbere mu mateka ya Premier League wegukanye iki gihembo ku nshuro ya gatatu (2017/18, 2021/22 na 2024/25).
Mu bindi bihembo byatanzwe harimo icyegukanwe na Morgan Rogers ukinira Aston Villa yahembwe nk’umukinnyi mwiza ukiri muto, nyuma yo gutsinda ibitego 8 agatanga imipira 10 yavuyemo ibitego mu mwaka ushize.
Nyuma yo gutanga ibi bihembo hatoranyijwe ikipe nziza y'umwaka igizwe n’umunyezamu Matz Sels (Nottingham Forest), myugariro ni William Saliba (Arsenal), Virgil van Dijk (Liverpool), Gabriel Magalhães (Arsenal) na Milo Kerkez (AFC Bournemouth).
Abakina hagati ni Ryan Gravenberch (Liverpool), Declan Rice (Arsenal) na Alexis Mac Allister (Liverpool). Ni mu gihe ba rutahizamu igizwe na Mohammed Salah (Liverpool), Alexander Isak (Newcastle United) na Chris Wood ( Nottingham Forest).
kwamamaza