Kiny
Eng
Fr
Kiyovu Sports yahannye Amis Cedric, imwambura ubukapiteni
Uwajeneza Donatha
Nov 26, 2025 - 11:36
Ubuyobozi bwa Kiyovu Sports Club bwahagaritse Captain w’ikipe, Amis Cedric, imikino ibiri yikurikiranya kubera amakosa yakoze mu kibuga. Ubuyobozi bw'iyi kipe yavuze ko bwamutakarije icyizere, ndetse bumwambura kuba umukinnyi uyoboye abandi ( Captain) kubera imyitwarire idakwiye umukinnyi w'umunyamwuga yagaragaje mu mikino ibiri iyi kipe iheruka gukina. Icyakora Amis Cedric yahise asaba imbabazi abababajwe n'imyitwarire ye.
kwamamaza
Amakosa n'imyitwarire idakwiye, ubuyobozi bwa Kiyovu Sports buvuga ko Amis Cedric uri mu bakinnyi bayo bakomeye, yayigaragaje mu mikino ibiri iyi kipe iheruka gukina.
Mu ibaruwa yandikiwe Amis Cedric, yashyizweho umukono na Perezida w’Ishyirahamwe Kiyovu Sports, Nkurunziza David, ndetse Isango Star yabonyeho, yerekana ko ayo makosa yayakoze ku mukino wayihuje na Gasogi United wabaye ku wa 21 Ugushyingo (11) 2025 mu mukino wa Gasogi United ndetse n'umukino yakinye n'ikipe ya Al Merrikh wabaye ku wa 24 Ugushyingo (11) 2025.
Bwavuze muri iyo mikino, Cedric yafashe igitambaro cy’ubukapitani (brassard) akagijugunya hasi imbere y’umutoza, abayobozi b'ikipe, bagenzi ndetse n’abafana, kandi ko imyitwarire nk’iyo idakwiye ku mukinnyi w’umunyamwuga kandi uyobora abandi mu kibuga.
Cedric amissi nyuma yo guhanwa n’ikipe ye yasabye imbabazi abafana ba Kiyovu Sports ndetse n'abandi bababajwe n'imyitwarire mibi yamugaragayeho, avuga ko atari agambiriye gutesha agaciro igitambaro cyambarwa n'umukinnyi uyoboye abandi ahubwo yari yirakariye nawe ubwe kubera umusaruro w'iyi kipe muri iyo mikino yombi yatsinzwe.
Nubwo yahanishijwe kudakina imikino ibiri no kwambura kuyobora abandi bakinnyi mu kibuga ( Captainw’ikipe), Cedric yategetswe gukomeza kwitabira imyitozo nk’uko biteganywa n’amasezerano afitanye na Kiyovu Sports.
kwamamaza