Kiny
Eng
Fr
Kinshasa: Kabila araburanishwa n' urukiko ku byaha bikomeye bifitanye isano na M23
Uwajeneza Donatha
Jul 25, 2025 - 10:33
Kuri uyu wa Gatanu, tariki 25 Nyakanga (07) 2025, Urukiko Rukuru rwa Gisirikare i Kinshasa, umurwa mukuru wa Repubulika Iharanira Demokarasi ya Congo, rwatangiye kuburanisha Joseph Kabila wahoze ari Perezida w’iki gihugu. Aregwa ibyaha bikomeye birimo ubugambanyi, gufasha umutwe wigometse wa AFC/M23 n’ibindi bifatwa nk’ibyaha byibasiye inyokomuntu.
kwamamaza
Kuri uyu wa Gatanu, tariki 25 Nyakanga (07) 2025, Urukiko Rukuru rwa Gisirikare i Kinshasa, umurwa mukuru wa Repubulika Iharanira Demokarasi ya Congo, rwatangiye kuburanisha Joseph Kabila wahoze ari Perezida w’iki gihugu. Aregwa ibyaha bikomeye birimo ubugambanyi, gufasha umutwe wigometse wa AFC/M23 n’ibindi bifatwa nk’ibyaha byibasiye inyokomuntu.
Ni ubwa mbere Kabila agejejwe imbere y’urukiko kuva yava ku butegetsi mu 2019. Uru rubanza rwatangiye nyuma y’uko muri Gicurasi (05) inteko ishinga amategeko imukuyeho ubudahangarwa yari afite nka senateri ubuzima bwe bwose, ndetse ntabashe kwitaba ngo yisobanure ku byo yashinjwaga.
Ubushinjacyaha bwa gisirikare buvuga ko Kabila ari inyuma y’umutwe wa M23 umaze igihe wigaruriye ibice byo mu burasirazuba bwa Congo. Aregwa ibyaha birimo ubugambanyi, gufatanya n’umutwe w’iterabwoba, gutera inkunga ibikorwa byo guhungabanya umutekano, gufata ku ngufu, kwica hakoreshejwe intwaro, gufata ku ngufu abagore, itotezwa n’ibindi byaha bihanishwa igihano cy’urupfu.
Ibi birego bifite aho bihuriye n’ubuhamya bwatanzwe na Eric Nkuba Malembe, wahoze akorana na Corneille Nangaa uyobora AFC/M23. Nkuba wahanishijwe igihano cy’urupfu umwaka ushize, yavuze ko Kabila na Nangaa bacuze umugambi wo guhirika Perezida Félix Tshisekedi binyuze mu bikorwa bya M23.
Ishyaka PPRD rya Kabila ryamaganye ibi birego, rivuga ko bishingiye ku mpamvu za politiki. Ferdinand Kambere, Umunyamabanga waryo, yavuze ko ari “ubutabera bubogamye bwifashishwa mu gucecekesha abatavuga rumwe n’ubutegetsi.”
Nubwo Kabila aherutse kugaruka muri Congo, yabonetse cyane mu bikorwa bya politiki mu mijyi ya Goma na Bukavu, aho yasabye ko haba ibiganiro bihuza Abanyecongo bose kugira ngo haboneke umuti urambye ku bibazo by’umutekano n’amacakubiri ya politiki.
Naramuka ahamijwe ibi byaha, Kabila ashobora guhanishwa igihano cy’urupfu, kimwe n’abandi bayobozi ba M23 nka Corneille Nangaa na Sultani Makenga bamaze kuburanishwa. Gusa ibi bikomeje gukorwa mu gihe hakomeje ibiganiro hagati ya Leta ya Congo n’abarwanyi ba M23 birimo kubera i Doha muri Qatar, mubyo AFC-M23 isaba harimo gukuraho ibi bihano byafatiwe abayobozi bayo.
@radio Okapi, bbc
kwamamaza