Kiny
Eng
Fr
“Intambara y’Amerika n’Ubushinwa yaba ibyago ku isi”: Minisitiri w’Ingabo w’Ubushinwa.
Uwajeneza Donatha
Jun 5, 2023 - 11:14
Li Shangfu; Minisitiri w'ingabo w'Ubushinwa, yavuze ko kujya mu ntambara n'Amerika yaba ibyago bitihanganirwa ku isi. Ibi yabitangarije mu nama y’umutekano, avuga ko hari ibihugu biri gukaza umurego wo kwigwizaho intwaro muri Aziya.
kwamamaza
Iri jambo rye ryahise rifatwa nk’irya mbere rikomeye avuze kuva yagera kuri uyu mwanya. Amerika n’Ubushinwa byagiye birebana ay’ingwe mu bihe bitandukanye ndetse ku mpamvu zitandukanye zirimo ikirwa cya Taiwan.
Gusa Gen. Li Shangfu yavuze ko isi ari nini bihagije ku Bushinwa n'Amerika, kandi ko ibi bihugu bibiri by'ibihangange bikwiye kureba uko byumvikana.
Ku wa gatandatu, igisirikare cy'Amerika kirwanira mu mazi cyavuze ko ubwato bw'intambara bw'Ubushinwa bwagenze mu buryo butarimo umutekano bwerekeza iruhande rw'ubwato bw'intambara bw'Amerika, ubwo bwari bunyuze mu bunigo bwa Taiwan buri kumwe n'amato y'intambara ya Canada.
Ubushinwa bwanenze ibyo bihugu byombi kubera icyo bwise guteza ibyago ku bushake. Amerika na Canada byavuze ko amato yabyo yari arimo kugenda ahemewe n'amategeko mpuzamahanga.
Gen. Li wabaye Minisitiri w'ingabo mu kwezi kwa Werurwe (3) uyu mwaka, yashinje Amerika kugira imitekerereze yo mu ntambara y'ubutita ndetse avuga ko ibyo birimo kongera cyane ibyago byo mu rwego rw'umutekano.
Mu ijambo rye, yavuze ko Ubushinwa butazemera ko amarondo y'ubwato bw'Amerika n'inshuti zayo aba urwitwazo rwo kugira ubwiganze bw'ingendo z'amato.
Ubwo ku cyumweru yabazwaga ibijyanye n’ibyabereye mu bunigo bwa Taiwan, Gen. Li wari mu nama izwi nka Shangri-La Dialogue yabereye muri Singapour, yavuze gusa ko ibihugu byo hanze y'ako karere birimo kongera ubushyamirane.
Iyi nama yabitangarijemo niyo yonyine ngarukamwaka ivuga ku mutekano w'akarere k'Aziya n'inyanja ya Pasifika.
Ubushinwa bwanze ubusabe bw'Amerika bwo kugirana ibiganiro bya gisirikare bitaziguye, bubikora mu kwamagana ibihano Amerika Gen. Li mu mwaka w’ 2018 kubera intwaro zaguzwe mu Burusiya.
Ibi byatumye muri iyo nama, Minisitiri w'ingabo w'Amerika Lloyd Austin anenga Ubushinwa kubera kwanga kugirana ibiganiro bya gisirikare n'Amerika.
Gen. Austin na Gen. Li bahanye ikiganza barasuhuzanya ndetse bavugana akanya gato ubwo habaga gusangira ifunguro rya nimugoroba ku wa gatanu ryo gutangiza iyo nama, ariko nta kintu cy'ingenzi baganiriye, nkuko amakuru abivuga.
Imvugo irimo kworoshya ya Minisitiri w'ingabo w'Ubushinwa igaragaza ko ibiganiro na mugenzi we w'Amerika bishoboka, ariko ko Amerika igomba gukuraho ibihano yamufatiye, nkuko byavuzwe na Zhou Bo, wahoze mu ngabo z'Ubushinwa ubu akaba ari mu kiruhuko cy'izabukuru.
Gen. Li yafatiwe ibihano muri 2018 kubera kwakira ibikoresho bya gisirikare bivuye mu Burusiya. Manda ye y'imyaka itanu nka Minisitiri w'ingabo yatangiye muri uyu mwaka, ariko ibyo bihano bimubuza gukorera ingendo muri Amerika, ndetse bituma agorwa no gutumira Gen. Austin mu Bushinwa, nkuko Zhou akomeza abivuga.
Nubwo hari umwuka mubi mu mubano wa diplomasi, umutegetsi wo hejuru wo muri minisiteri y'ububanyi n'amahanga y'Amerika yageze mu Bushinwa mu ruzinduko rw'icyumweru, aho azaganira ku ngingo zitandukanye n'abategetsi bo mu Bushinwa.
Umubano w’Amerika n'Ubushinwa wajemo igitotsi mu myaka ishize kubera ibibazo byinshi, birimo nko kuba Ubushinwa buvuga ko Taiwan ari iyabwo, no kubera ubushyamirane bwo mu karere k'inyanja yo mu majyepfo y'Ubushinwa.
Lt. Gen. Jing Jianfeng wo mu ngabo z'Ubushinwa yavuze ko nta mwanya uhari wo kumvikana kuri Taiwan, ashinja Amerika kwivanga muri ako karere. Iruhande rw'iyo nama, Jianfeng yabwiye itangazamakuru ko icyemezo cy'Amerika cyo kongera umubare w'abasirikare muri ako karere gishobora kongera ibyago byuko habaho gukozanyaho.
kwamamaza