Kiny
Eng
Fr
FERWAFA yabujije Haringingo gutoza Rayon Sports ibibazo afitanye na kiyovu Sports bitaracyemuka
SHUMBUSHO Darius
Apr 4, 2026 - 11:09
Ishyirahamwe ry’umupira w’amaguru mu Rwanda, FERWAFA, ryamenyesheje Rayon Sports ko umutoza Haringingo Francis atemerewe gutoza ku mukino uzabahuza na Gicumbi FC
kwamamaza
Ishyirahamwe ry’umupira w’amaguru mu Rwanda, FERWAFA, ryamenyesheje Rayon Sports ko umutoza Haringingo Francis atemerewe gutoza ku mukino uzabahuza na Gicumbi FC, bitewe n’ibibazo by’amasezerano agifitanye n’ikipe ya Kiyovu Sports yahoze atoza mbere yo kwerekeza muri Rayon Sports ibi bikubiye mu ibaruwa ifite nomero Ref 497/FERWAFA/2026, aho FERWAFA yasubizaga ubusabe bwa Rayon Sports bwari bwatanzwe mu ibaruwa ARS/043/2026 isabira ibyangombwa byemerera Haringingo kuyitoza.
Mu gusobanura icyemezo cyafashwe, FERWAFA yagaragaje ko yashingiye ku ngingo ya 28, agace ka 1 n’aka 2, k’amategeko agenga imiterere n’ihererekanya ry’abakinnyi n’abatoza (FERWAFA Regulations on the Status and Transfer of Players). Aya mategeko ateganya ko umutoza cyangwa umukinnyi udafite ibyangombwa byuzuye bitewe n’amakimbirane n’ikipe yari asanzwe abarizwamo adashobora guhabwa uburenganzira bwo gukorera indi kipe.
FERWAFA yatangaje ko kugeza ubu Haringingo atarahabwa uburenganzira bwo gutoza Rayon Sports, kuko atarabona ubwumvikane busesuye na Kiyovu Sports, ikipe yavuyemo. Iyi ngingo ishimangira ko ibibazo by’amasezerano hagati y’umutoza n’umukoresha we bigomba kubanza gukemurwa mbere yo kwemererwa gukomeza akazi ahandi.
lshyirahamwe ry’umupira w’amaguru mu Rwanda ryunzemo ko igihe impande zombi, ari zo Haringingo na Kiyovu Sports, zizaba zimaze kumvikana ku buryo bwemewe n’amategeko, ari bwo hazatangwa licence yemerera uyu mutoza gukora nk’umutoza mukuru wa Rayon Sports.
Iki cyemezo kije mu gihe Rayon Sports yari imaze iminsi ishaka gukoresha Haringingo mu mikino yayo ya shampiyona, by’umwihariko umukino ukomeye ubahuza na Gicumbi FC. Gusa kuba atemerewe kuwugaragaramo bishobora kugira ingaruka ku mikinire n’imyiteguro y’iyi kipe ikunzwe n’abatari bake mu Rwanda.
Nyamara ibi bibazo by’amasezerano bikomeje kugaragara mu makipe yo mu Rwanda, bishobora kugira ingaruka ku iterambere rya shampiyona, hakwiye gushyirwaho uburyo bwihuse bwo kubikemura mu mucyo no mu bwumvikane.
Ku ruhande rw’abakunzi ba Rayon Sports, hari impungenge ku musaruro w’ikipe mu gihe umutoza mushya ataremererwa kuyiyobora mu mikino iri imbere kandi kugeza ubu ntamuroza mukuru bafite.
kwamamaza