Kiny
Eng
Fr
FERWACY yakiriye impano ya SKOL BL irimo n’amagare agezweho
Uwajeneza Donatha
Dec 22, 2023 - 17:22
Ishyirahamwe ry’umukino w’amagare mu Rwanda (FERWACY) ryakiriye ibikoresho byifashishwa mu mukino w’amagare, inkunga yatanzwe n’uruganda rutunganya ibinyobwa bisembuye n’ibidasembuye.
kwamamaza
Ku gicamunsi cy’uyu wa Gatanu, ku itariki 22 Ukuboza (12) 2023, ku cyicaro cy’uruganda rwa SKOL Brewery Ltd mu Nzove nibwo habaye umuhango wo gushyikiriza FERWACY impano y’ibikoresho nkenerwa mu mukino w’amagare.
Mu bikoresho FERWACY yahawe na SKOL Brewery Ltd harimo; amagare 17 ya RIDLEY n’ibyuma bikoreshwa mu kuyakanika (Spare parts), imyenda yambarwa mu myitozo irenzwa ku myambaro nyirizina (bbbs) 339.
Ibindi ni imyenda nyirizina yambarwa mu mukino 594, imiguru 66 y’inkweto zambarwa n’abakinnyi batwaye igare, uturindantoki (Gants) 39, ingofero zambarwa n’abakinnyi batwaye (helmets) 104, amacupa 500 akoreshwa n’abakinnyi banywa amazi.
SKOL Brewery Ltd kandi yahaye FERWACY ibikombe 116 bashobora kuzajya bifashisha bahemba amakipe n’abakinnyi batsinze mu marushanwa atandukanye ndetse n’amadarubindi (Lunettes) yambarwa n’abakinni batwaye igare.
Umuyobozi w’uruganda rwa SKOL mu Rwanda, Eric Gilson, yavuze ko batanze iyi mpano kuri FERWACY mu rwego rwo gushyigikira iterambere rya siporo y’u Rwanda.
Yagize ati “ Turi uruganda rutanga serivisi zitandukanye, ni nayo mpamvu twafashe umwanzuro wo gushyigikira iterambere rya siporo y’u Rwanda. Siporo isaba byinshi kugira ngo itere imbere, icy’ibanze ni ibikoresho.”
Yakomeje agira ati “Ibi bikoresho bizafasha mu kuzamura impano n’urwego rw’umukino mu byiciro byombi yaba abakobwa n’abahungu kandi twizera ko umusaruro wabyo uzagaragara.”
Eric Gilson yasoje avuga ko iyi mpano SKOL Brewery Ltd ihaye FERWACY ije mu gice cyiza cya mbere y’uko hatangira undi mwaka bityo ngo ari impano ijya gusa n’iya Noheli n’Ubunani.
Perezida w’Ishyirahamwe ry’Umukino w’amagare mu Rwanda (FERWACY), Ndayishimiye Samson, yashimye ubuyobozi bw’uruganda rwa SKOL BL bwatanze ubushobozi bufatika mu gushyigikira umukino w’amagare kandi ko bigiye gutanga umusaruro mu myaka iri imbere.
Yagize ati “Ni impano twakirije amaboko yombi kuko biraza kudufasha muri gahunda irambye yo kuzamura impano z’abakinnyi bakiri bato no kurushaho kuzamura urwego rw’abasanzwe bakina.”
Ndayishimiye yakomeje avuga ko aya magare agomba kujya mu kigo giteza imbere umukino w’amagare kiri i Musanze bityo nyuma hazagenwa uburyo nyabwo bwo kuyakoresha kugira ngo azatanga umusaruro nyawo.
Uruganda rwa SKOL si rushya mu mukino w’amagare mu Rwanda kuko kuva mu 2014 kugeza mu 2021 bari abaterankunga bakuru ba Tour du Rwanda n’amarushanwa y’imbere mu gihugu.
Nyuma, uru ruganda rwashinze ikipe yaje kuzamuka igera ku rwego mpuzamahanga (Continental Team) n’ubwo nyuma uyu mushinga waje guhagarara. Kuri ubu SKOL Brewery Ltd na FERWACY bamaze kongera kubyutsa umubano.
@Sadam Mihigo/Isango Star-Kigali.
kwamamaza