Kiny
Eng
Fr
Cameroun: Umuyobozi w'abatavuga rumwe n’ubutegetsi agiye kugezwa imbere y’urukiko
Uwajeneza Donatha
Oct 29, 2025 - 09:14
Leta ya Cameroun yatangaje ko umuyobozi ukuriye abatavuga rumwe n’ubutegetsi, Issa Tchiroma Bakary, agiye kugezwa imbere y'ubutabera akurikiranyweho gutera imvururu nyuma y'amatora yabaye ku ya 12 Ukwakira (10) 2025, aho nibura abantu bane baguye mu myigaragambyo. Minisitiri w’Ubutegetsi bw’Igihugu, Paul Atanga Nji, yavuze ko Tchiroma yasabye abaturage gukora imyigaragambyo inyuranyije n’amategeko, nyuma yo kuvuga ko yatsinze amatora.
kwamamaza
Minisitiri Atanga Nji yatangaje ibi ku wa kabiri, ashimangira ko Issa Tchiroma Bakary azashyikirizwa inkiko kubera uruhare akekwaho mu gutegura imyigaragambyo yagaragayemo urugomo nyuma y’amatora ya Perezida yabaye muri Cameroun.
Yavuze ko abafatanyacyaha ba Tchiroma bacuze umugambi wo kwigomeka ku butegetsi kandi na bo bazaburanishwa. Nimugihe n'abapfuye yabise ko ari bamwe mu bagizi ba nabi bagizweho ingaruka n'ibyo bakoraga.
Amatora ya Perezida wa Cameroun yabaye ku wa 12 Ukwakira (10) yegukanywe na Perezida Paul Biya w’imyaka 92, watsindiye manda ya munani ku majwi 54% nk’uko byatangajwe n’akanama k’igihugu gashinzwe kurinda itegekonshinga. Ibi bimugira Perezida wa mbere ukuze kurusha abandi ku Isi.
Naho Tchiroma Bakary; wari watangaje mbere ko yatsinze amatora ndetse agahamagarira abamushyigikiye gukora imyigaragambyo mu mahoro, yabonye 35%, avuga ko atemera ibyavuye mu matora kuko amajwi yibwe.
Mu mijyi irimo Douala, Garoua n’iyindi yo mu majyepfo ashyira uburengerazuba yibasiwe n’imyigaragambyo, aho abigaragambya bashyize za bariyeri mu mihanda, batwikira mo amapine, ndetse habaho gukozanyaho n’abashinzwe umutekano. Minisitiriw’IntebeAtenga Nji yavuze ko abigaragambya bane bahasize ubuzima, abandi barakomereka barimo n'abashinzwe umutekano.
Tchiroma yabwiye BBC ko atazemera ibyavuye mu matora ndetse ko nta bwoba afite bwo gufungwa. Yavuze ko ku munsi w’itangazwa ry’ibyavuye mu matora, abagabo bitwaje imbunda barashe ku bigaragambya bari hafi y’urugo rwe i Garoua, bikaviramo babiri ibikomere byabavuyemo urupfu ku basivile babiri.
Imiryango mpuzamahanga irimo ONU, AU na EU yasabye Leta ya Cameroun kwirinda gukoresha imbaraga no gushaka ibisubizo biciye mu biganiro.
Ku rundi ruhande ariko, hari abavuga ko izi mvururu zishobora gusiga igihugu mu makimbirane ya politike arambye, mu gihe Perezida Biya, umaze imyaka 43 ku butegetsi, akomeje gushinjwa kwigizayo abatavuga rumwe na we.
@bbc, rfi
kwamamaza