Kiny
Eng
Fr
Uwahoze ari Perezida yangiwe kwiyamamaza, umugore we aratungurana!
Uwajeneza Donatha
Sep 10, 2025 - 17:31
Uwahoze ari umugore w’umukuru w’igihugu wa Côte d’Ivoire, Simone Gbagbo w’imyaka 76, yatunguye benshi ubwo yashyirwaga ku rutonde rw’abakandida bazahatana mu matora y’Umukuru w’igihugu azaba ku wa 25 Ukwakira (10) 2025. Nimugihe Laurent Gbagbo yangiwe kwiyamamaza.
kwamamaza
Simone Gbagbo azahangana na Perezida uri ku butegetsi Alassane Ouattara w’imyaka 83, umaze imyaka 14 ayobora igihugu, wagiye ku butegetsi nyuma y’amatora y’umwaka wa 2010 yateje imyigaragambyo ikomeye yahitanye abantu basaga ibihumbi bitatu, ubwo Laurent Gbagbo – umugabo wa Simone yatsindwaga maze abamushyigikiye bakayoboka imihanda, nawe agafatirwaga mu ndake (bunker).
Laurent Gbagbo, nawe yari yatanze candidature ku mwanya wa Perezida, ariko ntiyemerewe kwiyamamaza, hamwe na Pascal Affi N’Guessan wahoze ari Minisitiri w’Intebe na Tidjane Thiam wahoze ayobora banki Credit Suisse.
Uru rutonde rw’abangiwe kwiyamamaza rwateye impungenge ku bwisanzure bw’amatora y'umukuru w'igihugu, bamwe bavuga ko rushobora gutera imyigaragambyo.
Thiam, yangiwe kwiyamamaza n'urukiko rushinzwe iyubahirizwa ry'Itegeko Nshinga bitewe n'uko yigeze kugira ubwenegihugu bw'Ubufaransa, yise icyo cyemezo "igikorwa cyo kwangiza demokarasi". Yagirije kandi ubutegetsi bwa Ouattara gutegura amatora arimo amanyanga kugira ngo agume ku butegetsi.
Laurent Gbagbo yangiwe kwiyamamaza n'urukiko rushinzwe iyubahizwa ry'Itegeko Nshinga rya Cote d'Ivoire/ Yvory Cost bitewe n’urubanza yaciriwe mu 2018 ku byaha byo gusahura Banki Nkuru mu myigaragambyo yakurikiye amatora yo mu 2010. N’ubwo yaje guhabwa imbabazi na Perezida Ouattara mu 2020, ntabwo yahawe uburenganzira bwo gutora cyangwa kwiyamamaza.
We n'umugore we Simone Gbagbo, banakurikiranwyeho ibyaha byibasiye inyoko muntu n'urukiko mpuzamahanga mpanabyaha ( CPI), ariko nyuma baje kugirwa abere kuri birego.
Simone Gbagbo, wari uzwi nka “La Dame de Fer” (umugore w’icyuma), ni we mugore wa mbere ufite izina rikomeye wemerewe guhatanira kuyobora Côte d’Ivoire/ Yvory Cost. Yemerewe kwiyamamaza hamwe na Henriette Lagou Adjoua wahoze ari Minisitiri.
Simone afite ubunararibonye muri politiki, yabaye umudepite kandi yagize uruhare rukomeye mu bikorwa by'imyigaragambyo byakurikiye amatora ya 2010 byahitanye abarenga ibihumbi bitatu, ari nabyo byatumye akurikiranwa na CPI mui 2012. Yigeze gukatirwa gufungwa imyaka 20 mu mwaka w' 2015, ariko muri 2018 Perezida Ouattara yamugiriye imbabazi mu cyo yise gushaka " kunga abaturage".
Ubu intero yo kwiyamamaza ni “Kubaka igihugu gishyashya, Africa yigenga, yubashwe kandi iteye imbere”. Abasesenguzi bavuga ko kuba yemerewe ari ubutumwa bukomeye bushimangira ko abagore nabo bashobora guhatanira ku mwanya nk'uyu, hatitawe ku myaka cyangwa amateka yabo.
Ntibiramenyekana niba Laurent Gbagbo, bamaze imyaka irenga 30 bashakanye, basangiye urugamba rwa politiki, gufungwa, kuyobora igihugu, n'ibindi, azamushyigikira mu matora. Aba bombi batandukanye mu 2023.
Kwiyamamaza bizatangira ku mugaragaro ku itariki ya 10 Ukwakira (10), mu gihe abazatora barenga miliyoni 8,7 bamaze kwiyandikisha. Amaso yose ubu ari kuri Simone Gbagbo, harebwa niba ashobora gukurura abaturage bihagije ku buryo yazatungurana agatsinda amatora.
Ouattara ugiye guhatana kuri mandat ye ya kane, yahinduye Itegeko Nshinga mu mwaka 2016, ritamwemereraga kurenza mandat ebyizi nk'umukuru w'igihugu.
@bbc
kwamamaza