Kiny
Eng
Fr
Tadej Pogačar ukinira Ikipe ya UAE Team Emirates - XRG, yegukanye isiganwa ry'umunsi umwe "Strade Bianche
SHUMBUSHO Darius
Mar 8, 2026 - 01:21
Umunya-Slovenia Tadej Pogačar ukinira Ikipe ya UAE Team Emirates - XRG, yegukanye isiganwa ry'umunsi umwe "Strade Bianche" mu Butaliyani, ryareshyaga n'ibilometero 203 nyuma yo gukoresha amasaha ane, iminota 45 n'amasegonda 15.
kwamamaza
Uyu mukinnyi w’imyaka 27 yatangiye neza umwaka w’amasiganwa, wa 2026 kuko iri siganwa ari ryo rya mbere yitabiriye muri uyu mwaka. Ni ku nshuro ya kane aritwaye, ariko rikaba ari ubwa gatatu aritwayeho yikurikiranya, ibintu byongeye kugaragaza ubuhanga bwe mu masiganwa yo ku mihanda ivanze n’amabuye byaranze isiganwa bakinaga rya Strade Bianche, Ikintu cyagarutsweho cyane muri iri siganwa ni uburyo Pogačar yitandukanyije n’abandi agasiganwa wenyine mu bilometero 80 bya nyuma, ibintu byamufashije kugera ku ntsinzi idashidikanywaho.
Muri icyo gice cy’isiganwa, yakoresheje impuzandengo y’umuvuduko wa kilometero 42,7 mu isaha (km/h), ashimangira ko yazamuye urwego ugereranyije n’umwaka wa 2025 aho yari yakoresheje impuzandengo ya 40.705 km/h.
Mu bandi basiganwa bitwaye neza, Umufaransa Paul Seixas ukinira Ikipe ya Decathlon CMA CGM Team ni we wabaye uwa kabiri, mu gihe Umunya-Mexique Isaac Del Toro, usanzwe akinana na Pogačar mu ikipe imwe, yabaye uwa gatatu.
Iyi ntsinzi ya Pogačar ikomeje kumwongerera izina rikomeye mu mukino w’amagare ku isi, ndetse inamushyira mu bahabwa amahirwe yo kuzitwara neza mu masiganwa akomeye ategerejwe muri uyu mwaka.
kwamamaza