Kiny
Eng
Fr
Real Madrid yerekanye Trent Alexander-Arnold nk'umukinnyi wayo mushya
Uwajeneza Donatha
Jun 12, 2025 - 16:36
Ikipe ya Real Madrid yo muri Espagne yamaze kwerekana ku mugaragaro Trent Alexander-Arnold nk’umukinnyi wayo mushya, nyuma yo gutandukana na Liverpool yo mu Bwongereza, aho yari amaze imyaka 20.
kwamamaza
Alexander-Arnold wahawe nimero 12, aje mu mwanya w’abakinnyi bakomeye barimo Marcelo, Pablo Garcia na Eduardo Camavinga, nawe wayambaraga mu mwaka ushize w’imikino.
Uyu mukinnyi w’imyaka 28, wavukiye i Liverpool tariki 7 Nyakanga 1996, yatangiye gukinira ikipe y’iwabo ya Liverpool kuva akiri umwana muto mu 2004, afite imyaka 6. Yazamuwe mu ikipe nkuru mu 2016 ku bw’umutoza Jurgen Klopp, aho yakiniye Liverpool imikino 259, ayitsindira ibitego 18.
Mu myaka yamaze muri Liverpool, Trent Alexander-Arnold yegukanye ibikombe 8 birimo Premier League 1, UEFA Champions League 1, ndetse n’ibindi bikombe bitandukanye by’imbere mu gihugu no ku mugabane w’u Burayi.
Ku rwego mpuzamahanga, amaze gukinira ikipe y’igihugu y’u Bwongereza (The Three Lions) imikino 33, ayitsindira ibitego 4.
Alexander-Arnold yasinye amasezerano y’imyaka 6 muri Real Madrid, azarangira mu mwaka wa 2031. Amakuru aturuka muri Espagne avuga ko yatanzweho miliyoni 10 z’amadolari, akaba azajya ahembwa ibihumbi 312,000 by’amadolari buri cyumweru, bikamushyira mu bakinnyi bahembwa menshi muri Real Madrid.
Trent Alexander-Arnold azajyana na Real Madrid mu gikombe cy’isi cy’amakipe (FIFA Club World Cup) kizabera muri Leta Zunze Ubumwe za Amerika guhera tariki ya 15 Kamena 2025. Real Madrid izakina umukino wayo wa mbere kuwa Gatatu tariki ya 18 Kamena, aho izahura na Al Hilal.
@Darius Shumbusho/ Isango Star-Kigali
kwamamaza