Kiny
Eng
Fr
Iran yahishuye ko yamaze kwiga uburyo bushya bwo kwirwanaho mu gihe intambara yakubura
Uwajeneza Donatha
Apr 21, 2026 - 07:51
Mu gihe agahenge hagati ya Leta Zunze Ubumwe za Amerika na Iran kari hafi kurangira, impande zombi zongeye guterana amagambo ashotorana. Iran yatangaje ko ishobora gukoresha uburyo bushya bwo kwirwanaho mu gihe intambara yakubura, igaragaza ko ishidikanya kuri Amerika mu biganiro by’amahoro bikomeje kudindira.
kwamamaza
Iminsi y’agahenge mu ntambara yo mu burasirazuba bwo hagati iri kugana ku musozo mu gihe umubano wa Washington na Téhéran uri kurushaho kuzamba. Iran yavuze ko ititeguye kugirana ibiganiro iriho igitutu, yemeza ko yamaze kwitegura uburyo bushya bwo kwirwanaho mu gihe intambara yakongera kubura.
Yifashishije X, Perezida w'Inteko ishinga amategeko y'iki gihugu, Mohammad Bagher Ghalibaf, yashimangiye ko muri iki gihe cy'agahenge, igihugu cye cyize uburyo bushya bwo kwirwanaho.
Ku rundi ruhande, Donald Trump yakomeje kugaragaza ko Amerika idashobora koroshya igitutu, cyane cyane ku bijyanye na gahunda ya nikleyeri ya Iran. Ibi bijyana n’ibikorwa bya gisirikare biherutse, birimo gufatira ubwato bwa Iran mu muhora wa Umuhora wa Hormuz, inzira ifatiye runini ubucuruzi bw’isi.
Ibiganiro by’amahoro byari byitezwe kubera i Islamabad byamaze kujya mu gihirahiro, nyuma y’uko Iran itangaje ko itazabyitabira muri iki cyiciro, ivuga ko ishidikanya ku bushake bwa Amerika bwo kugera ku masezerano arambye.
Hagati aho, Ubushinwa bukomeje kugaragaza ko bwagira uruhare rukomeye mu gushakira umuti iyi ntambara. Perezida Xi Jinping yasabye ko umuhora wa Hormuz uguma ufunguye, ndetse agirana ibiganiro n’abayobozi batandukanye bo mu karere mu rwego rwo kugabanya umwuka mubi.
Ni mu gihe igihe cy’agahenge kigenda kirangira, amahanga akomeje gutegereza niba hazabaho gusubira ku meza y’ibiganiro cyangwa niba impande zombi zishobora kongera kwinjira mu ntambara ishobora kugira ingaruka zikomeye ku mutekano n’ubukungu bw’isi, cyane ko kurasa k'ubwato bwa Iran bwatumye igiciro cy'akagunguru ka Peteroli kazamukaho amadolari 5.
kwamamaza