Kiny
Eng
Fr
Abasirikare b’Impinduramatwara ba Iran bagiye gushyirwa ku rutonde rw’imitwe y’iterabwoba, Turkey ikaze umutekano ku mupaka
Uwajeneza Donatha
Jan 29, 2026 - 15:12
Umuryango w’Ubumwe bw’u Burayi (UE) watangaje ko urimo gusuzuma icyemezo cyo gushyira Abasirikare b’Abarinzi b’Impinduramatwara ba Iran (IRGC) ku rutonde rw’imitwe y’iterabwoba, mu rwego rwo guhana ubutegetsi bwa Tehran bushinjwa gukandamiza abigaragambya ndetse no gufasha Uburusiya mu ntambara yo muri Ukraine. Ni mu gihe Turkey yateguje kongera umutekano ku mupaka ihana na Iran kubera impungenge z’igitero gishobora kugabwa n’Amerika.
kwamamaza
Ibi byatangajwe na Kaja Kallas, umuyobozi wa dipolomasi mu muryango w'Ubumwe bw’u Burayi, ku wa Kane tariki ya 29 Mutarama (01), mbere y’inama yahuje ba Minisitiri b’Ububanyi n’Amahanga b’ibihugu 27 bya UE i Bruxelles. Yavuze ko UE ishobora kwemeranya gushyira IRGC ku rutonde rw’imitwe y’iterabwoba, ashimangira ko "uwitwara nk’umutwe w'iterabwoba ugomba gufatwa nk’ukora iterabwoba".
Uyu mwanzuro witezwe mu gihe UE igiye gufatira Iran ibihano bishya bitewe n’ibikorwa ry’iyicarubozo biri gukorerwa abigaragambya, byavuzwe ko byahitanye nibura abantu 30,000.
Ni ibihano bivugwa ko bigamije bamwe mu bayobozi ba IRGC bagize uruhare rukomeye mu gukandamiza iyo myigaragambyo, aho bashobora kubuzwa kwinjira ku butaka bw’u Burayi no gufatirwa imitungo yabo. Hari n’abandi bantu n’ibigo bishinjwa gufasha Uburusiya intwaro zirimo drones na misile.
Nubwo bimwe mu bihugu birimo Ubutaliyani n’Ubufaransa byamaze kugaragaza ko bishyigikiye uwo mwanzuro, gusaba ubwumvikane bwa bose mu bihugu 27 bya UE bishobora kuwukoma mu nkokora. Iran yo yahise iteguza ingaruka zikomeye” zishobora guterwa n’icyo cyemezo.
Hagati aho, Turkey yatangaje ko yiteguye kongera umutekano ku mupaka wayo ureshya na kilometero zirenga 500 ihana na Iran, mu gihe Amerika yayigabaho ibitero. Iki gihugu cyavuze ko itinya ubwiyongere w’impunzi kandi kigasaba ko hakomeza gushakishwa umuti wa dipolomasi hagati ya Washington na Tehran.
@RFI , Lefigaro
kwamamaza