Kuwa Kabiri tariki 12 Werurwe 2024 i Cairo mu Misiri hazabera ibirori bya tombola y’uko amakipe azahura mu mikino ya ¼ cy’irangiza mu mikino ya TOTAL Enegies CAF Champions League na Confederation Cup y’umwaka w’imikino 2023-2024.

kwamamaza

Kuri uyu wa Kabiri, impuzamashyirahamwe y’umupira w’amaguru muri Afurika (CAF) yatangaje ko kuwa 12 Weruwe 2024 ari bwo amakipe umunani yageze muri ¼ muri buri cyiciro azamenya uko azahura.

Tombola nyirizina izatangira saa munani z’amanywa (14h00) hakowa iya TOTAL Energies CAF Confederation Cup mu gihe iya TOTAL Energies CAF Champions League izakorwa guhera saa cyenda (15h00).

Muri TOTAL Energies CAF Champions League, amakipe umunani yageze muri ¼ cy’irangiza ni; Al Ahly (Egypt), ASEC Mimosas (Cote d’Ivoire), Mamelodi Sundowns (South Africa), Atletico Petroleos (Angola), TP Mazembe (DR Congo), Simba SC (Tanzania), Esperance Sportive de Tunis (Tunisia) na Young Africans (Tanzania).

Imikino ya kimwe cya kane izatangira tariki 29-30 Werurwe 2024 bakina imikino ibanza mu gihe weekend ya tariki 5-6 Mata 2024 bazakina iyo kwishyura.

Imikino ya kimwe na kabiri yo iyibanza yayo izakinwa tariki 19-20 Mata mu gihe iyo kwishyura ari tariki 26-27 Mata 2024.

Umukino wa nyuma, uwubanza wawo uzakinwa tariki 19 Gicurasi 2024 mu gihe uwo kwishyura unasoza umwaka wa CAF Champions League uzakinwa tariki 26 Gicurasi 2024.

Ku rundi ruhande, muri TOTAL Energies CAF Confederation Cup, amakipe umunani yageze muri ¼ cy’irangiza ni; USM Alger (Algeria), Zamalek (Egypt), Dreams FC (Ghana), RS Berkane (Morocco), Modern Future (Egypt), Abu Salem (Libya), Rivers United (Nigeria) na Stade Malien (Mali).

Imikino ya kimwe cya kane izakinwa tariki 31 Werurwe 2024 mu gihe iyo kwishyura yayo izakinwa tariki 7 Mata 2024.

Imikino ya kimwe cya kabiri izakinwa tariki 21 Mata 2024 hakinwa iyibanza mu gihe iyo kwishyura izakinwa tariki 28 Mata 2024.

Umukino wa nyuma ubanza uzakinwa tariki 10 Gicurasi 2024 mu gihe umukino uzatangirwaho igikombe uzakinwa tariki 17 Gicurasi 2024.

Umwaka ushize w’imikino mu marushanwa ya CAF kuri uru rwego, igikombe cya TOTAL Energies CAF Confederation Cup cyatwawe na USM Alger yo muri Alger itsinze Yanga SC yo muri Tanzania.

Igikombe cya TOTAL Energies CAF Champions League umwaka w’imikino 2022-2023 cyatwawe na Al Ahly SC yo mu Misiri itsinze Wydad AC yo muri Maroc.

Al Ahly SC yo mu Misiri ibitse igikombe cy'umwaka w'imikino ushize iracyari mu irushanwa

Yanga SC yo muri Tanzania yatsindiwe ku mukino wa nyuma wa CAF Confederation Cup 2022-2023 yageze muri 1/4 cya Champions League

Ibirori bya Tombola ya 1/4 cy'irangiza cy'amarushanwa ya CAF izakorwa kuwa 12 Werurwe 2024 i Cairo mu Misiri

Umujyi wa Cairo niwo uzakira ibirori bya Tombola dore ko ari naho haba ibiro bya CAF

@Sadam Mihigo/Isango Star-Kigali.

CAF CL & CAF CC: Amatariki ya tombola ya ¼

Uwajeneza Donatha Mar 5, 2024 - 16:03