Kiny
Eng
Fr
UCI25: Umunya-Suède Jakob Söderqvist yegukanye ITT y’abatarengeje imyaka 23
Uwajeneza Donatha
Sep 22, 2025 - 18:15
Umunya-Suède, Jakob Söderqvist, ni we wegukanye umudali wa Zahabu mu gusiganwa n’ibihe basiganwa buri muntu ku giti cye (Individual Time Trial – ITT) mu bagabo batarengeje imyaka 23, muri Shampiyona y’Isi y’Amagare iri kubera i Kigali. Yakoresheje iminota 38’24’’ ku ntera y’ibilometero 31,2, kuva kuri BK Arena kugeza kuri Kigali Convention Centre.
kwamamaza
Söderqvist yarushije Nate Pingle wo muri Nouvelle-Zélande umunota n’amasegonda atatu, mu gihe Maxime Decomble w’u Bufaransa yabaye uwa gatatu, bamusiga umunota n’amasegonda ane.
Ni isiganwa ryitabiriwe n’abakinnyi 61 bo mu bihugu 43, bose bahatanira kwegukana umudali wa zahabu watwawe n'Umunya-Espagne, Romeo Abad Ivan, ubwo Shampiyona y'Isi y'Amagare, yaberaga i Zürich mu Busuwisi.
Ku ruhande rw’u Rwanda, abakinnyi babiri nibo bari bahagarariye igihugu muri iki cyiciro: Tuyizere Etienne ukinira Java Inovotec na Niyonkuru Samuel ukinira Team Amani yo muri Kenya.
Nubwo bakoze uko bashoboye, nta n’umwe wabashije gusoza muri 25 ba mbere. Niyonkuru yabaye uwa 28, bamusiga iminota 4’50’’ na Söderqvist, mu gihe Tuyizere yabaye uwa 30, asigwa iminota 5’12’’.
Tuyizere Etienne, w’imyaka 22, yari akinnye Shampiyona y’Isi ku nshuro ya kane, nyuma yo guhagararira u Rwanda bwa mbere mu 2021 i Flandre mu Bubiligi (U19), mu 2023 i Glasgow muri Ecosse no mu 2024 i Zürich mu Busuwisi.
Iri siganwa riri kubera Kigali ryakurikiwe n’abaturage benshi, cyane abo mu bice bya Gahanga i Kicukiro, bari bategereje ku mihanda kugira ngo barebe abakinnyi banyura hafi yabo.
Biteganyijwe na Niyonkuru azasubira mu muhanda akina isiganwa ryo mu bahungu batarengeje imyaka 23, ritegerejwe ku wa Gatanu.
Shampiyona y'Isi y'amagare izakomeza ku wa Kabiri, ku ya 23 Nzeri 2025, hakina ingimbi n'abangavu batarengeje imyaka 19, mu cyiciro cyo gusiganwa n'ibihe.
Ingimbi zizatangira gukina saa 14:00 mu gihe bashiki babo bazatangira kujya mu muhanda saa 10:45.
kwamamaza