Kiny
Eng
Fr
FIFA Club World Cup: Chelsea na Palmeiras zabimburiye andi makipe muri 1/4
Uwajeneza Donatha
Jun 29, 2025 - 12:31
Imikino ya 1/8 cy’irushanwa ry’Igikombe cy’Isi cy’Amakipe yitwaye neza ku migabane (FIFA Club World Cup) ikomeje kubera muri Leta Zunze Ubumwe za Amerika, aho amakipe yavuye mu matsinda yatangiye imikino yo gukuranamo.
kwamamaza
Kuri uyu wa Gatandatu, Chelsea yo mu Bwongereza yabonye itike yo kugera muri 1/4 nyuma yo gutsinda Benfica Lisbon yo muri Portugal ibitego 4 kuri 1. Uyu mukino wabereye kuri Bank of America Stadium i Charlotte muri Leta ya North Carolina. Wigeze guhagarikwa iminota irenga 90 kubera ibibazo by’ikirere kitari kimeze neza, imvura n’inkuba bituma umukino uhagarara habura iminota itatu ngo urangire.
Chelsea yari yayoboye umukino ku gitego cyatsinzwe na kapiteni wayo Reece James ku munota wa 64. Ariko ubwo abakinnyi bagarukaga mu kibuga ngo basoze umukino, Benfica yaje kwishyura icyo gitego ku munota wa 90, bituma umukino urangira amakipe yombi anganya igitego 1-1, bisaba ko hongerwaho iminota 30 y’inyongera.
Ni muri iyo minota y’inyongera Chelsea yaje kwigaragaza neza, itsinda ibindi bitego bitatu byayihesheje intsinzi ku bitego 4-1, ndetse n’itike yo gukomeza muri ¼.
Muri icyo cyiciro, Chelsea izacakirana na Palmeiras yo muri Brésil ku wa Gatanu i Philadelphia. Palmeiras nayo yabonye itike yo kugera muri 1/4 isezereye Botafogo FC ku gitego 1-0. Aya makipe yombi yo muri Brésil nayo yasabwaga gukina iminota y’inyongera kugira ngo hamenyekane uwegukana intsinzi.
Dore amwe mu mafoto yaranze uyu mukino:
@Darius Shumbusho/ Isango Star-Kigali.
kwamamaza