Kiny
Eng
Fr
M23, FARDC na FDLR mu majwi mu bashinjwa gukora ihohotera rishingiye ku gitsina muri RDC
Uwajeneza Donatha
Mar 9, 2026 - 10:49
Raporo nshya y’Ibiro by’Umuryango w’Abibumbye bishinzwe uburenganzira bwa muntu muri RDC igaragaza ko mu 2025 ihohotera rishingiye ku gitsina ryakozwe mu ntambara ryiyongereye cyane mu Burasirazuba bw’igihugu, rikibasira cyane abagore n’abakobwa, imitwe yitwaje intwaro n'ingabo za RDC harimo n'abo mu rwego rw'ubutadi bashyizwe mu majwi . Ni mu gihe abana bavuka ku bafashwe ku ngufu bahura n’ivangura rikomeye n’ibibazo by’imibereho.
kwamamaza
Raporo yo muri 2025 y’Ibiro by’Umuryango w’Abibumbye bishinzwe uburenganzira bwa muntu muri Repubulika Iharanira Demokarasi ya Congo (BCNUDH) igaragaza ko ihohotera rishingiye ku gitsina rifitanye isano n’intambara rigeze ku rwego ruteye inkeke.
Muri uwo mwaka, hamenyekanye nibura ibirego 887 by' ihohotera rishingiye ku gitsina, ryibasiriye abantu 1,534 barimo abagore 854 n’abakobwa 672. Intara za Kivu y’Amajyaruguru na Kivu y’Amajyepfo ni zo zibasiwe cyane kuko zihariye hafi 80% by’abahohotewe bose.
Raporo igaragaza ko 75% by’abahohotewe bagiriwe nabi n’imitwe yitwaje intwaro ikorera mu Burasirazuba bwa RDC, irimo M23, Wazalendo, CODECO, imitwe ya Maï-Maï, FDLR na ADF.
Nanone kandi raporo igaragaza ko bamwe mu bagize inzego za leta zirimo igisirikare (FARDC), polisi (PNC) n’urwego rw’ubutasi (ANR) bashinjwa kugira uruhare muri iryo hohoterwa ku kigero cya 19%.
Mu byagaragajwe nk’ibikomeye cyane muri iyo raporo ni abakoreshwa ubucakara bushingiye ku gitsina, aho abagore n’abakobwa bafatwa bugwate bakagumishwa mu bunyage igihe kirekire bagafatwa ku ngufu inshuro nyinshi ndetse bamwe bagaterwa inda ku gahato.
ARadio Okapi yatangaje ko abana bavuka muri ayo mahano bakunze guhura n’ivangura rikomeye, bamwe ntibandikwe mu bitabo by’irangamimerere, abandi bagakura bafite ibyago byo gushorwa mu mitwe yitwaje intwaro. Raporo ivuga ko hari igisekuru cy’abana bavukira mu ihohotera no mu guhezwa n’imiryango.
Ku bijyanye n’ubuvuzi n’ubufasha ku bahohotewe, raporo igaragaza ko nubwo 70% babona ubuvuzi bwihuse, abagera kuri 2% gusa ari bo bahabwa ubufasha bwuzuye burimo ubufasha mu by’amategeko, mu mitekerereze no mu mibereho.
BCNUDH yasabye ubuyobozi bwa RDC kwihutisha gukurikirana abakekwaho ibyo byaha, kwita ku iyandikwa ry’abana bavuka mu gufatwa ku ngufu no kurwanya ivangura ribakorerwa.
Yasabye kandi imitwe yitwaje intwaro guhagarika ihohoterwa, kurekura abagore n’abakobwa bafashwe bugwate no guhagarika ubucakara bushingiye ku gitsina. Yasabyre nanone amahanga kongera inkunga kugira ngo abahohotewe bahabwe ubufasha burambye.
kwamamaza