Kiny
Eng
Fr
Inteko Ishinga Amategeko ya RDC yatesheje agaciro ubusabe bwo kweguza Minisitiri Jacquemain Shabani
Uwajeneza Donatha
Apr 30, 2026 - 09:37
Inteko Ishinga Amategeko ya Repubulika Iharanira Demokarasi ya Congo yatesheje agaciro ubusabe bwari bugamije gukuraho Jacquemain Shabani, Minisitiri wungirije ushinzwe umutekano n’Ibikorwa by’imbere mu gihugu, nyuma yo gusanga bwatanzwe mu buryo bunyuranyije n’amategeko burimo imikono itemewe n’amakuru atuzuye ku babushyigikiye.
kwamamaza
Inteko Ishinga Amategeko yahagaritse gusuzuma ubwo busabe bwo kweguza Jacquemain Shabani mu nama yabaye kuri uyu wa Gatatu, yitabiriwe n’abadepite 490, yagaragayemo impaka zikomeye.
Jacquemain Shabani asanzwe ari Minisitiri wungirije wa mbere ushinzwe Umutekano n’ibikorwa by'imbere mu gihugu. Mu nshingano ze harimo kugenzura no kuyobora ibikorwa by’umutekano w’igihugu, kugenzura imikorere ya polisi, gukurikirana imiyoborere y’inzego z’intara n’ubuyobozi bw’inzego z’ibanze, ndetse no gufasha mu guhuza ibikorwa bigamije kurinda ituze n’umutekano w’abaturage.
Ubusabe bwo kumukuraho bwari bwatanzwe na depite Laddy Yangotikala, washinjaga Minisitiri Shabani kunanirwa guhangana n’ibibazo by’umutekano muke bikomeje kugaragara mu bice bitandukanye by’igihugu.
Yagaragazaga cyane cyane ubwiyongere bw’ubujura bwitwaje intwaro n’ubwambuzi bukorerwa abaturage i Kinshasa no mu yindi mijyi minini ya RDC, avuga ko ibyo byerekana intege nke mu miyoborere no mu bijyanye n'umutekano.
Yanamushinjaga kandi kwivanga mu mikorere y’inzego z’ubuyobozi bw’intara zitandukanye zirimo Kinshasa, Haut-Katanga, Kasaï-Central na Tshopo.
Mu gihe Inteko yari iri gusuzuma ubwo busabe, depite Garry Sakata yahise atanga ikirego ku buryo bwatanzwemo, avuga ko harimo imikono y’abantu batabyemerewe ndetse n’amakosa mu myirondoro ya bamwe mu babushyigikiye.
Icyo kirego cyemejwe n’abadepite benshi, bituma ubusabe bwo gukuraho Minisitiri Jacquemain Shabani mu nshingano ze buhita buteshwa agaciro, kubusuzuma bihita bihagarara.
Perezida w’inteko yahise asoza icyo gikorwa, bityo ntihabaho ibiganiro cyangwa itora ku birego byari byamutanzweho.
@Radio Okapi
kwamamaza