Kiny
Eng
Fr
Bobi Wine wamaganye ibyavuye mu matora yatangaje ko ari guhigwa, asaba abanya-Uganda kwigaragambya
Uwajeneza Donatha
Jan 23, 2026 - 14:17
Robert Kyagulanyi Ssentamu uzwi nka Bobi Wine; Umukandida- Perezida utavuga rumwe n'ubutegetsi muri Uganda, yatangaje ko ari mu bwihisho kuko ari guhigwa n’ingabo z’igihugu. Yamaganye burundu ibyavuye mu matora ya Perezida aherutse, avuga ko yabayemo uburiganya bukomeye, ubwicanyi n’itotezwa rikabije. Yasabye Abanya-Uganda gukora imyigaragambyo mu mahoro mu rwego rwo guharanira demokarasi.
kwamamaza
Mu kiganiro yagiranye na Radio France Internationale (RFI), Bobi Wine yavuze ko n’ubwo akiriho, nta mutekano afite kuko ingabo zamugize umuhigo. Yemeje ko n’umuryango we uri mu kaga, aho umugore we n’abandi bo mu muryango bagoswe n’ingabo, badafite uburenganzira bwo gusohoka cyangwa kwakira ibibatunga, ndetse n’ibiribwa bigeragezwa kubageraho bigasubizwa inyuma.
Uyu muyobozi w’ishyaka National Unity Platform (NUP) yavuze ko kuva amatora yabaye ku wa 15 Mutarama (01), Uganda yibasiwe n’igitugu n’ubwicanyi, aho avuga ko abantu barenga 100 bamaze kwicwa mu gihugu hose, abandi benshi bagafungwa nta byaha bashinjwa.
Yatangaje ko abamwungirije batatu batawe muri yombi, barimo abagore babiri bafashwe mbere y’umunsi w’itora bakaba bakiri mu maboko y’inzego z’umutekano kandi aho bari ntiharamenyekana.
Bobi Wine kandi yanenze ubutegetsi ku rupfu rw’abantu 10 bishwe ku munsi w’amatora mu rugo rwa depite Muhammad Muwanga Kivumbi, avuga ko umunani muri bo bari abagore bakusanyaga inyandiko z’ibyavuye mu matora. Yahakanye ibyo Perezida Yoweri Museveni yavuze byo kubita “abakora iterabwoba”.
Iruhande rw'ibi, Bobi Wine yavuze ko bafite amashusho agaragaza abapolisi, abasirikare n’abakozi ba Komisiyo y’Amatora batoranyaga amajwi mbere y’igihe mu nyungu za Museveni. Gusa yemeje ko atazitabaza inkiko kuko azifata nk’izigendera ku butegetsi.
Yahamagariye Abanya-Uganda gukora imyigaragambyo mu mahoro ndetse no gukoresha uburyo bwose budahutaza mu rwego rwo kotsa igitutu ubutegetsi bwa Museveni. Yasabye kandi umuryango mpuzamahanga kureka uburyarya no gushyira Afurika ku gipimo kimwe mu kubahiriza demokarasi n’uburenganzira bwa muntu.
@Rfi
kwamamaza